Asociacioni i Gazetarëve të Kosovës ka dënuar fushatën denigruese të anëtarëve të Komunës së Prishtinës dhe kryetarit të saj Përparim Rama ndaj gazetares së grupit KOHA, Saranda Ramaj dhe Kohavisionit, pas publikimit të raportimeve për këmbimin e pronave në Badoc.
AGK-ja i ka konsideruar si fushatë të orkestruar sulmet ndaj gazetares Ramaj dhe KTV-së. Ka ftuar Komunën e Prishtinës të distancohet nga gjuha e tillë.
“Përparim Rama në një sërë intervistash e ka akuzuar KOHA-n për “dezinformim”, kurse akuza të rënda ka bërë edhe Drejtoresha për Urbanizëm në Komunën e Prishtinës, Doruntina Maloku. Në seancën e anulimit të vendimit Maloku disa herë e ka sulmuar grupin KOHA, duke thënë mes tjerash: ‘A nënkupton kjo që ka pasur interes të kalojë kjo pikë apo vetëm pasi kjo u bë publike nga media të caktuara për qëllime krejtësisht që i shërbejnë interesave politike grupore e biznesore’. Ndërkohë, disa llogari në Facebook, të hapura së fundi kanë postuar statuse denigruese për gazetaren Ramaj, duke e mbrojtur Ramën dhe Komunën e Prishtinës. Këto sulme dhe kjo gjuhë janë të papranueshme, dhe AGK-ja e fton Komunën e Prishtinës që të distancohet, e të ofrojë përgjigje zyrtare e institucionale për të gjitha pretendimet e ngritura”, thuhet në reagimin e AGK-së. /Kosovatimes/
