Në kuadër të shënimit të 16-vjetorit të pavarësisë së Kosovës është promovuar libri “Ora e Kosovës: Pavarësia dhe Shtet-ndërtimi”, në Bibliotekën Kombëtare të Kosovës “Pjetër Bogdani”.
Libri trajton angazhimin e ish-presidentit Sejdiu në etapa të ndryshme historike, si dhe rrugëtimin e Kosovës në shumë faza, deri te shtetndërtimi.
Ishte president në datën kur Kosova u shpall shtet i pavarur, andaj edhe librin e tij të ri e ka titulluar “Ora e Kosovës: Pavarësia dhe Shtetndërtimi”. Libri i promovua në praninë e personaliteteve të shumta.
“Një pesëvjeçar i përmbledhur në një libër është edhe një dedikim personal i presidentit Sejdiu gjatë mandatit në krye të shtetit, në një periudhë sfiduese, por historike”, tha Vjosa Osmani, presidente e Kosovës.
“Shoh që është një vepër shkencore, që, në njëfarë mënyre, legjitimon backroundin e Fatmir Sejdiut”, tha Bamir Topi, ish-president i Shqipërisë.
“Brezat që vijnë edhe nuk e njohin historinë, kur dalin vepra ka personalitete që kanë pasur pjesë direkte të jetës së tyre, duke punuar për këtë qëllim, këto janë shumë të rëndësishme”, deklaroi Alfred Moisiu, recensent.
“Edhe gjatë dhe pas procesit të Ahtisarit ky kishte një koncept, ai dinte se deklarata e pavarësisë, në qoftë se do të vinte, nuk do nuk mund ta anashkalonte UNMIK-un dhe Kombet e Bashkuara”, theksoi Joachim Rucker, ish-shef i UNMIK-ut në Kosovë
“Në libër ka pjesë të tëra të formimit të institucioneve të reja me rendësi specifike për Kosovën”, tha Ibrahim Berisha, redaktor i librit.
“Do të jetë një referencë për këdo që do të merret me shkrimet e historisë”, deklaroi Avni Spahiu, recensent.
Autori, Fatmir Sejdiu, duke falënderuar pjesëmarrësit, tha se ka qenë punë e përbashkët e të gjithëve. Ky botim vjen në prag të 16-vjetorit të pavarësisë së Kosovës.
