Kryeministri Albin Kurti ka takuar deputeten finlandeze dhe kryetaren e Grupit të Miqësisë ndërmjet Kosovës dhe Finlandës, Tytti Tuppurainen, në kuadër të Konferencës së Sigurisë në Munih.
Kurti uroi deputeten Tuppurainen për anëtarësimin e Finlandës në NATO, duke shtuar se e konsideron si ombrellën më të rëndësishme të sigurisë sot për demokracinë dhe se edhe Kosova ka synim anëtarësimin e plotë.
“Për sa i përket zhvillimeve të fundit në vend dhe diskutimeve në lidhje me Rregulloren e re të Bankës Qendrore mbi Operacionet me Para të Gatshme, ai e njoftoi deputeten Tuppurainen me qëllimet e kësaj rregulloreje dhe kujdesin e institucioneve të vendit për të siguruar zbatim sa më të lehtë të saj. Këtu ai nënvizoi periudhën tranzitore që në fokus ka informimin dhe planin 10 pikësh të Bankës Qendrore për zbatim të lehtësuar”, thuhet në njoftimin e Kryeministrisë.
Në takim, gjithashtu u fol edhe për procesin e dialogut të ndërmjetësuar nga Bashkimi Evropian.
Kryeministri Kurti pranoi urimet nga deputetja finlandeze Tuppurainen me rastin e 16-vjetorit të shpalljes së pavarësisë së Republikës së Kosovës dhe përgëzime për progresin e arritur viteve të fundit të evidentuar edhe nga indekset ndërkombëtare. /Kosovatimes/
