Në rajonin e Dukagjinit është instaluar sistemi i ri i antenave, me ç’rast është gjashtëfishuar fuqia transmetuese e dy kanaleve të Transmetuesit Publik- Radio Kosova 1 dhe Radio Kosova 2.
“Vitin e kaluar gjatë debateve publike me qytetarët kemi pasur ankesa të shumta nga banorët e rajonit të Dukagjinit e sidomos nga Gjakova për sinjal të dobët të Radio Kosovës. Që nga ajo kohë bashkë me drejtorin e përgjithshëm Shkumbin Ahmetaxhekaj kemi dhënë një zotim se ky problem do të jetë ndër prioritetet kryesore të punës sonë, prandaj jam shumë i lumtur që ende pa i bërë një vit, sot po bëhet realitet”, tha drejtori i Radio Kosovës, Arsim Halili, pas vendosjes së transmetuesve të rinj dhe sistemit të antenave, të cilat vijnë pas 24 vjetësh mungese të investimit kapital në mbulueshmërinë e territorit me sinjal tokësor të Radio Kosovës.
“Me instalimin e këtij sistemi të ri të antenave do të gjashtëfishohet fuqia transmetuese e dy kanaleve të transmetuesit publik. Me këtë jam shumë i lumtur që po përmbushet edhe një obligim ligjor i yni për të shtrirë sinjalin në gjithë territorin e Kosovës dhe për t’u ofruar mundësinë qytetarëve, banorëve të kësaj ane që ta kapin sinjalin e Radio Kosovës pa pagesë. Besoj që kjo është një përmbushje e misionit tonë dhe besoj që po bëhet një hap shumë i rëndësishëm drejt rritjes së dëgjueshmërisë së kanaleve të transmetuesit publik të Kosovës”, tha Halili.
“Sot e kemi përmbyllur me sukses e kemi ndërruar komplet sistemin e antenave, kemi rritë fuqinë në Radio Kosova 1 dhe Radio Kosova 2 dhe shpresoj që tashmë nuk do të kemi problem. Gjatë këtij viti kemi parapa investime edhe në pika tjera transmetuese siç është maja e gjelbër që përfshinë Anamoravën dhe Cernushën, e cila përfshinë rajonin e Mitrovicës dhe më gjerë”, tha Genc Berisha, inxhinier përgjegjës për transmetim.
Sipas drejtorit të Radio Kosovës, Arsim Halili, ditë më parë në Golesh u instaluan me sukses edhe dy transmetues të rinj me fuqi prej 5KW të cilët e kanë dhjetëfishuar fuqinë e transmetimit dhe përmirësimin e dëgjueshmërisë së radios. Për të gjitha këto investime, thotë Halili kemi pasur një përkrahje të madhe nga Drejtori i Përgjithshëm dhe Bordi i RTK-së.
