Shërbimi Spitalor Klinik e Universitar i Kosovës (ShSKUK) është deklaruar lidhur rastin e vdekjes së 4-vjeçares nga Gjakova në Qendrën Klinike Universitare të Kosovës, duke treguar për trajtimin që i është ofruar.
ShSKUK thotë se ka kërkuar raporte të detajuara nga Spitali Përgjithshëm në Gjakovë dhe nga QKUK, ku ishte trajtuar pacientja dhe se të njëjtat do t’i shqyrtojë.
Qendra Klinike Universitare e Kosovës, në lidhje me trajtimin mjekësor të 4-vjeçares nga Gjakova, sqaron, se e njëjta ka kërkuar ndihmë mjekësore, rreth orës 15:00, të datës 17 shkurt 2024, në Qendrën Emergjente të Qendrës Klinike Universitare të Kosovës.
“Pacientja sjellët nga Spitali i Gjakovës, si rast i intubuar për në Qendrën Emergjente të QKUK-së, me parametra vital dhe me gjendje mjaft të rënduar shëndetësore”, thotë ShSKUK .
Tutje bëhet e ditur se në Qendrën Emergjente të QKUK-së janë kryer të gjitha analizat laboratorike dhe ato diganostike – radiologjike dhe se janë thirrur në konsultë edhe mjekët e lëmenjve përkatëse.
“Pas të gjitha konsultave, vendoset për trajtim të mëtejmë në Repartin Intensiv në Klinikën e Pediatrisë, me diagnozë të punës Sepsë (infeksion akut i rëndë i shkallës se lartë).Përkundër të gjitha masave reanimatore të ekipeve të mjekëve të Klinikës së Pediatrisë, për shkak të gjendjes së rënduar shëndetësore, fëmija ndërron jetë me datë 19 shkurt 2024”, thuhet në njoftim.
ShSKUK, apelon që mos të spekulohet në lidhje me shkaqet e vdekjes së pacientes, deri në rezultatet e hetuesisë, të cilat do të merren parasysh edhe nga ShSKUK për veprime të mëtejme. /Kosovatimes/
