Ambasada Amerikane ka shfaqur në Bibliotekën Kombëtare në Prishtinë filmin dokumentar “20 ditë në Mariupol”. Ky film i cili u shfaq në shënim të dy vjetorit të luftës në Ukrainë është nominuar për çmimin Oscar.
Ambasadori i Shteteve të Bashkuara të Amerikës në Kosovë, Jeffry Hovenier, tha se lufta e Ukrainës nuk është vetëm një luftë për të mbrojtur territorin e saj, por ka të bëjë me mbrojtjen e sovranitetit të saj, ka të bëjë me mbrojtjen e pikëpamjeve të saj të ndërhyrjeve politike. Ai mes tjerash theksoi se Kosova e kupton më së miri se çka do të thotë që shtëpitë e tyre të kërcënohen.
“Duke iu kundërvënë agresionit të Rusisë, Ukraina i dërgon një mesazh të fuqishëm botës se parimet e lirisë, demokracisë, të drejtës për vetëvendosje, për të zgjedhur vetë aleancat dhe partneritetet dhe klubet që do t’u përkasin ose nuk do t’u përkasin, por këto janë parime për të cilat ia vlen të luftosh. Pushtimi rus i Ukrainës nuk është gjithashtu një kërcënim vetëm për Ukrainën, por një kërcënim për të gjithë ne. Siç ka thënë vazhdimisht presidenti Biden, ne nuk mundemi, ne nuk do ta pranojmë agresionin e Rusisë” , ka deklaruar ambasadori amerikan.
Mes tjerash, ambasadori Hovenier tha se Rusia nuk është një kërcënim vetëm për Ukrainën, por për të gjithë shoqërinë dhe se të gjithë partnerët ndërkombëtarë duhet të angazhohen për ta mbrojtur atë.
“Kjo është një sfidë themelore dhe e papranueshme për rendin ndërkombëtar, për paqen dhe sigurinë ndërkombëtare. Nëse lejojmë që agresioni i Putinit kundër Ukrainës të ketë sukses, ai do të formojë regjime autoritare në mbarë botën”, ka theksuar Hovenier.
Ambasadori amerikan nuk la pa përmendur edhe përkrahjen që Kosova i ka ofruar Ukrainës. Ai tha se megjithëse Kosova mund të jetë e vogël, veprimet e solidaritetit dhe bujaria janë vërtet mjaft të mëdha.
Të pranishëm në shfaqjen e filmit “20 ditë në Mariupol” ishin gazetarët Ukrainas që jetojnë në Kosovë, përfaqësues të institucioneve të ndryshme dhe politikan kosovarë.
