Kryeministri i Maqedonisë së Veriut, Talat Xhaferi, vizitoi qendrën ku jepen pasaportat në Tetovë. Aty ai ishte me kritika të ashpra ndaj punonjësve pasi nga mospuna e shërbyesve civilë, qytetarët e këtij vendi po presin me orë të tëra për t`u pajisur me dokumentacion.
Kryeministri i Maqedonisë së Veriut, Talat Xhaferi, vizitoi sot sektorin e punëve të Brendshme në Tetovë ku zbuloi parregullsi të mëdha nëpër sportelet ku aplikohet dhe jepen dokumente të udhëtimit.
“Përshtypja e përgjithshme është se ka mungesë organizimi për kryerjen e detyrave në nivel ditor dhe institucioni përkatës në aspekt organizativ do të duhet bën përpjekje që pranimi i dokumenteve të jet në një formë dhe dhënia e dokumenteve të gatshme në formë tjetre”, tha kryeministri Xhaferi.
Xhaferi tha se vërejtjet e tij do t’ua shprehë edhe udhëheqësve të Ministrisë së Brendshme, për mungesën e organizimit në sektorët e punëve të Brendshme.
“Kjo është punë e përcjelljes se atyre që janë përgjegjës për këtë punë. Para meje janë përgjegjës ministra, zëvendësministra, ndihmësministra dhe atyre do të ju tregohet ajo që e kam paralajmëruar se kjo është mënyra e të bërit kontroll mbikëqyrje të punës së atyre që i keni në varësi”, tha ai
Tollovitë para sporteleve të Ministrisë së Brendshme u rritën pas 12 shkurtit, kur dolën nga përdorimi të gjitha dokumentet me emrin e vjetër të Maqedonisë.
Zëvendësimi i dokumenteve personale, pasaportave, letërnjoftimeve me emrin “Maqedonia e Veriut”, është obligim për banorët e këtij vendi, bazuar në Marrëveshjen e Prespës, ndërmjet Shkupit dhe Athinës për ndryshimin e emrit të shtetit, që ishte arritur në qershor të vitit 2018.
