Policia e Kosovës ka kryer një bastisje, të shtunën, në fshatin Graniçan të komunës së Leposaviqit, me ç’rast ka zbuluar improvizim të laboratorit të drogës.
Gjatë kësaj bastisje janë sekuestruar 23 bimë të mbjella të dyshuara të kanabisit, me gjatësi nga 40 cm deri në 1.85 cm, si dhe pajisje tjera të cilat nevojiten për improvizimin e laboratorit (poqa, ventilim etj.).
“Me datën 24.02.2024 rreth orës 07:30, Njësia e DHTN Mitrovicë Veri në koordinim me Drejtorinë Rajonale në Mitrovicë Veri kemi pranuar një informatë se në shtëpinë e të dyshuarit R.V.(1981) në fshatin Graniçan, Komuna Leposaviq dyshohej se ka të improvizuar laborator për kultivimin e bimëve të kanabisit. Njësia DHTN Mitrovicë Veri nën asistimin e zyrtarëve policor nga DRP Mitrovicë Veri, kemi bërë bastisjen së bashku me objektet përcjellëse të shtëpisë, ku gjatë bastisjes në një dhomë të shtëpisë kemi gjetur dhe sekuestruar 23 bimë të mbjella të dyshuar të kanabisit me gjatësi nga 40 cm deri ne 1.85 cm, si dhe pajisje tjera të cilat nevojiten për improvizimin e laboratorit (poqa, ventilim etj.). Njësia e forenzikës ka bërë fotografimin dhe sekuestrimin e dëshmive. Ne lidhje me rastin është njoftuar prokurori nga departamenti i krimeve të rënda dhe me udhëzim të tij nga bimët merren disa mostra që do të dërgohen në laborator, kurse pjesa tjetër me urdhër të prokurorit shkatërrohen”, ka bërë të ditur për RTKlive, Veton Elshani, zv/drejtor i policisë në Mitrovicë të Veriut.
Ai tutje ka bërë të ditur se i dyshuari nuk është hasur në shtëpi, por i njëjti rreth orës 19:30 është ndaluar dhe arrestuar në pikën kufitare në Jarinjë dhe me aktvendim të prokurorit të shtetit i është caktuar masa e ndalimit policor prej 48 orësh.
