Kryeministri i Kosovës, Albin Kurti, sot e vizitoi Universitetin e Qytetit të Dublinit (Dublin City University), ku u takua me presidentin e këtij Universiteti, Daire Keogh, zëvendës presidentin për Hulumtim, profesor John Doyle, Drejtoren Ekzekutive për Angazhim të Jashtëm, Laura Mahoney dhe Dekanin e Asociuar për Hulumtim në këtë universitet, Dr. Gëzim Visoka, si dhe përfaqësues nga Instituti për Zgjidhjen e Konflikteve Ndërkombëtare dhe Rindërtim (IICRR).
Sipas njoftimit të Qeverisë, tema qendrore të takimit ishin bashkëpunimet e mundshme përmes programeve të shkëmbimeve në nivel të studentëve dhe stafit akademik, rritja e kapaciteteve universitare në fushën e kërkimeve, të drejtat e komuniteteve jo-shumicë dhe drejtësia tranzicionale.
“Kryeministri Kurti foli për rezultatet e qeverisjes së deritanishme të përkthyera në indikatorë pozitivë ekonomikë dhe demokratikë, politika të prezantuara për herë të parë, angazhimin dhe projektet e qeverisë me fokus te komunitetet jo-shumicë dhe veprimet dhe hapat e ndërmarrë në fushën e drejtësisë tranzicionale”, ka njoftuar Zyra e Kryeministrit. /Kosovatimes/
