Nis seanca solemne e Kuvendit të Kosovës, me rastin e 26-vjetorit të Epopesë së Ushtrisë Çlirimtare të Kosovës.
Me himnin shtetëror të Kosovës dhe atë kombëtar të Shqipërisë ka nisur seanca në nderim të sakrificës së familjes Jashari, të rënë në Prekaz të Drenicës. Kryetari i Kuvendit, Glauk Konjufca, ka kërkuar një minutë heshtje për të nderuar heronjtë e rënë për lirinë e Kosovës.
Të pranishëm janë Rifat Jashari dhe përfaqësuesë të tjerë të familjes heroike, presidentja Vjosa Osmani, kryeministri Albin Kurti, ambasadorë e krerë të tjerë shtetëror.
Këngëtari dhe kantautori Ilir Shaqiri në seancën solemne interpretoi këngën kushtuar ditëve historike të këtij muaji, “Sërish vjen marsi”. Ndërkaq Shkurte Fejza ka interpretuar këngën “Mora fjalë”, e cila njihet si dedikim për komandantin legjendar të UÇK-së, Adem Jashari.
