Të gjithë janë të çmendur pas Joshua Zirkzee. Interesimi rreth sulmuesit holandez rritet edhe më shumë pas golit të shënuar të dielën ndaj Atalantës.
Mënyra më e mirë për të festuar thirrjen e radhës nga kombëtarja e Holandës. Dhjetë golat në kampionat kanë bërë që lojtari të tërheq vëmendjen e skuadrave të mëdha, sidomos atyre në Premier League që kanë filluar ta mbajnë nën vëzhgim yllin e Bologna-s.
Bologna po fërkon duart, sepse e di se ka një fitim shumë të madh në duar. I paguar vetëm 8.5 milionë dy vjet më parë, Zirkzee tani vlen rreth 60 milionë euro. Edhe Bayern Munich krenohet me lojtarin, pasi zotëron 50% të kartonit në rast rishitjeje. Për më tepër, gjermanët mund ta rimarrin atë duke i paguar 40 milionë klubit italian. Natyrisht duhet edhe miratimi i Joshua-s, i cili për momentin nuk duket aq i tërhequr nga mundësia e kthimit në Gjermani.
Për të ardhmen e tij ai sheh më shumë Premier League ose një ekip të madh të Serisë A. Dhe këtu nuk mungojnë kërkuesit. Milani e vëzhgon që nga tetori me drejtorin Moncada, i cili tashmë ka qenë dy herë në Dall’Ara për ta ndjekur live. Kujdes edhe për Napolin që do të ketë shumë para për të investuar nga shitja e mundshme e Osimhenit (Chelsea dhe PSG e duan atë).
Pa harruar mentorin e tij Thiago Motta, i cili me kënaqësi do ta merrte me vete në aventurën e radhës.
