Kryeministri i Republikës së Kosovës Albin Kurti, i shoqëruar nga ministrja e Ekonomisë, Artane Rizvanolli, ministri i Mjedisit, Planifikimit Hapësinor dhe Infrastrukturës, Liburn Aliu dhe zëvendësministrja e Punëve të Jashtme dhe Diasporës, Liza Gashi, priti sot në takim Drejtorin për zhvillim të biznesit të kompanisë MASDAR nga Abu Dhabi, Ahmed Al Awadi, si dhe menaxherin e lartë për zhvillim, Serkan Atta.
Kompania MASDAR është kompani nga Abu Dhabi e cila është me renome botërore në fushën e energjisë së ripërtëritshme.
Kryeministri Kurti dhe anëtarët tjerë të kabinetit qeveritar në takim prezantuan përparësitë që vendi ynë ofron dhe mundësitë e investimit në Kosovë – veçanërisht në ndërtimin e kapaciteteve të reja të burimeve të ripërtëritshme të energjisë, përfshirë ato të planifikuara përmes pakos investive, ku parashihet ndërtimi i kapaciteteve prej 950 MW të energjisë së erës, diellit si dhe kapacitete akumuluese, e të cilat pritet të kapin vlerën investive prej 1.2 miliardë euro.
Këto kapacitete kanë filluar me ankandin tonë të parë diellor 100 MW, procesi i ofertimit për të cilin është përmbyllur me sukses gjatë muajit janar. /Kosovatimes/
