Kanë pak kilometra distancë, por për të mbërritur nga Prishtina në Fushë Kosovë, qytetarët po mbesin të bllokuar në trafik deri në më shumë se një orë.
Ata thonë për shkak të mos ndërtimit të rrugëve alternative që lidhin këto dy komuna, për çdo ditë po përballen me kolona.
Për shkarkimin e komunës nga kolonat, për këtë vit është paraparë një projekt, i cili ende s’ka marrë aprovim nga Ministria e Infrastrukturës.
“Kemi bërë dy tri kërkesa në ministri, është rruga e Uglarit, e kemi bërë një kërkesë dhe të shohim a po na provon ministria e Infrastrukturës. Një alternativë tjetër ka qenë më herët që rruga “Nëna Terezë” të rikonstruktohet nga rrethi i Fushë Kosovës deri te kazerma, kur do të fillojë nuk e di”, ka thënë Bardhyl Kojqiqi, drejtor i Investimeve Kapitale në Fushë Kosovë.
E nga ministria të pyetur më herët nga RTK lidhur me këto projekte, kanë thënë se janë duke i shqyrtuar.
“Ata kanë propozuar një projekt që nga lagjja Dardania në Fushë Kosovë përdhes Hekurudhës të ndërtohet një rrugë që del te ETC që do të shkarkonte qarkullimin nga Prishtina në Fushë Kosovë. Ne duhet ta shohim a e kanë bërë projektin, nëse kanë projekte do të ulemi dhe ta shohim koston a mund ta financojmë ose do të gjejmë ndonjë”, ka thënë Hysen Durmishi, zëvendësministër i Infrastrukturës.
