Një familje 17-anëtarëshe, ka nevojë për ndihmë. Prindërit e 15 fëmijëve, disa prej të cilëve me probleme shëndetësore, kërkojnë nga secili që ka mundësi t`u ndihmojë, që jeta e tyre të jetë më e lehtë. Kjo familje që jeton në Prishtinë po kërkon në veçanti ndihmë financiare për shërimin e djalit të tyre 27-vjeçar.
Familjarët thonë se jetojnë pa asistencë sociale dhe varen vetëm nga të ardhurat nga puna e kohëpaskohshme e kryefamiljarit. Andaj, e zonja e shtëpisë tregon se fëmijët e kanë ndërprerë edhe mësimin.
“Jemi 17-anëtarë, 15 fëmijë unë e burri. Me një pagë është pak. Jeta është shumë e vështirë. Asistencë sociale nuk marr sepse fëmija me i vogël është 7 vjeç. Asnjë fëmijë nuk punon. Një fëmijë është me aftësi të kufizuar, është autik. Edhe djali vogël me sindrome. Të tjerët janë të shendosh”, tha Bahrie Gashi për RTK.
Por brenga me e madhe e familjes është shërimi i djalit të madh, për çka i mungojnë mjetet financiare.
“Streha nuk mungon, problemin më i madh është shëndeti i djalit. I ka tri unaza të lënduara dhe për shkak të kësaj gjendje, ka ra në depresion… Për shërimin e tij kërkohen 2 mijë euro”, theksoi Bahrie Gashi.
Zonja e shtëpisë shpreson se në prag të muajit të shenjtë të Ramazanit, t`u dilet në ndihmë fëmijëve të saj.
Sipas një raporti të UNDP-së për vitin 2023, ndër si probleme me te cilat përballet Kosova, ishin identifikuar varfëria, papunësia dhe inflacioni.
