Serbia mori mesazhe të qarta nga Brukseli zyrtar se ata janë në dijeni të lidhjeve të ngushta mes Beogradit dhe Moskës. Pas raportimeve në mediat evropiane se një ushtarak serb është spiun rus, që takoi zyrtarë të ndryshëm evropianë, analistët në Beograd rikujtojnë se Serbia po zhytet në autokraci dhe se mosbesimi ndaj këtij vendi nga Bashkimi Evropian po rritet çdo ditë.
Përveç thirrjeve që Serbia të përafrohet me politikën e jashtme dhe të sigurisë të BE-së në lidhje me Rusinë, këto ditë po vijnë mesazhe të veçanta. Zyrtarët e Brukselit njoftuan se janë në dijeni të lidhjeve të autoriteteve të Beogradit me Moskën në fusha të ndryshme, prandaj thonë se sillen me kujdes kur ndajnë informacione.
Për opozitën, mesazhe të tilla tregojnë se Serbia po largohet nga Evropa dhe Perëndimi.
Natan Albahari, nga partia opozitare Lëvizja e Qytetarëve të Lirë, thotë se Serbia nën Vuçiqin nuk është një partner i besueshëm i BE-se dhe Perëndimit. Sipas tij, këto janë pasojat e të gjitha vendimeve dhe marrëdhënieve te ngushta me Moskën.
Albahari thotë, se pyetja është se në cilin drejtim dëshiron të shkojë Vuçiq nëse rruga e Serbisë është Evropa.
“Lëvizjet e kësaj qeverie në dhjetë vitet e fundit nuk na japin besimin se kjo është rruga drejt së cilës po shkon Serbia. Kur marrim një paralajmërim nga Brukseli apo Uashingtoni se informacione të ndryshme ushtarake apo inteligjente nuk duhet të ndahen sepse ekziston dyshimi se do të përfundojë në duart e Rusisë apo Kinës, atëherë nuk duhet të habitemi pse presionet nga ato vende po rriten dhe pse nuk po hapen kapitujt (me BE-ne) dhe pse bota na sheh duke u fundosur në një autokraci gjithnjë në rritje”, thekson Albahari.
Pas raportimit te portalit ‘Politiko’ se një “sindikalist ushtarak serb, i cili vitin e kaluar u takua me zyrtarë evropianë ne Bruksel per t’u ankuar për sjelljen e qeverisë së presidentit Vuçiq, është agjent rus”, mosbesimi i perëndimit ndaj zyrtarëve serbë po rritet. Deri me tani nuk ka reagime zyrtare të Serbisë.
Sipas vlerësimeve, lidhjet zyrtare por edhe joformale me Moskën krijojnë probleme të shumta në rrugën evropiane te Serbisë.
Zoran Vulletiq, kryetari i Forumit Demokratik Qytetar, tha për RTK-në se është plotësisht e kuptueshme dhe e pritshme, sepse sipas tij, fatkeqësisht, Serbia dhe politika serbe nuk i kanë dhënë asnjë argument BE-së se ata me të vërtetë shkojnë në BE.
“Kjo politike shihet nga aspekti i agresionit rus ndaj Ukrainës, për çka Serbia “qartazi u rreshtua me atë agresion nga pala rus.Mosbesimi nuk është për t’u habitur, duke pasur parasysh edhe sjelljen e Vulinit, tani ish-shefi i inteligjencës. Ai ishte gati të spiunonte për interesat ruse. E tha hapur këtë. Është një njeri që mori gjithashtu një mirënjohje nga drejtori i FSB-së, kështu që nuk është çudi qëndrim i perëndimit dhe mosbesimi ndaj zyrtarëve serbë”, tha Vulletiq.
Beogradi zyrtar refuzon të vendosë sanksione ndaj Rusisë dhe pret mbështetjen e Moskës për çështjen e Kosovës.
Megjithatë, pjesa pro-evropiane e shoqërisë serbe beson se nuk mund të ketë përparim në rrugën evropiane të Serbisë deti sa ajo mban lidhje të ngushta me Moskën.
