Një fshat i Kosovës po vazhdon të braktiset. Burrniku i Ferizajt do të mbetet edhe me më pak banorë rezidentë, pasi infrastruktura mungon. Ata pak banorë që kanë mbetur, kërkojnë që të përshpejtohen investimet infrastrukturore e në Komunë thonë se do të investojnë pasi e kanë pikësynim që këtë fshat ta bëjnë turistik.
Fshati Burrnik i Ferizajt po braktiset vazhdimisht. Besnik Kosumi është ndër banorët e vetëm që vazhdon të jetojë në këtë fshatin i cili dikur kishte mbi 50 shtëpi e ku funksiononte edhe shkolla.
Besniku thotë se ai merret me blegtori dhe pemëtari dhe kërkon që pos rrugës kryesore të rregullohen edhe ato dytësore
“Po jeta është pak e vështirë shkaku i disa rrugëve shkaku i rrymës që nuk kemi të mjaftueshme një frymë një erë një shi a diçka ka probleme me rrymë. Jeta është shumë e mirë këtu me fol të drejtë natyra e mirë ajri i pastër gjithçka, qytetin e kemi shumë afër diku 11 kilometra nga këtu. Fshati është shumë i mirë vetëm të kishte pasur mundës që të na ndihmohet që rryma të stabilizohet rruga të na shtrohet sepse kemi mbetur disi shumë keq”, tha ai për RTK.
Banori Eset Neziri thotë se çdo ditë është në fshat por që qëndrimi i përhershëm me familje ende nuk është i mundur.
“Gjatë verës qëndrojmë këtu dy tre muaj jetojmë poshtë prapë ngjitemi lartë nga 21 marsi që të punojmë blegtori me lopë me dele (arsyeja pse zbritni poshtë) rruga bora të sëmurit, fëmija në shkollë”, theksoi Neziri.
Në Drejtorinë e Zhvillimit Ekonomik thonë se fshati Burrnik është duke u kthyer në një fshat turistik dhe se do të ketë investime të vazhdueshme.
“Konkretisht në këtë zonë tash e disa vite është duke u rregulluar infrastruktura rrugore e cila tani është në një gjendje shumë të mirë e cila të jep mundësi të zhvillimit të kapaciteteve dhe resurseve të gastronomisë kështu që ne si drejtori kemi rregulluar shtigjeve të ecjeve për grupet e alpinistëve dhe se jemi duke paraparë që së shpejti që disa shpella që janë në atë fshat ti rregullojmë dhe ti bëjmë të qasmë për vizitorët”, tha Balton Dërguti, drejtor i Zhvillimit Ekonomik në Ferizaj.
Me fillimin e ndërtimit të disa shtëpive por edhe të vilave, burrnikasit shpresojnë që fshati të gjallërohet dhe banorët t`i kthehen jetesës, në mënyrë që të shijohet bukuria natyrore e kësaj ane.
