Kryeministri i Kosovës, Albin Kurti ka uruar të dielën të gjithë besimtarët Islam me rastin e muajit të Ramazanit, duke iu dëshiruar besimtarëve agjërim sa më të lehtë. Këtë urim Kurti e bëri gjatë një vizite që i bëri xhamisë Pirinaz, së bashku kryetarin e Bashkësisë Islame, myftiun Naim Tërnava dhe ministrin e Kulturës, Hajrullah Çeku.
Kurti tha se kjo xhami e cila është rifunksionaliuzar për ramazan pas restaurimit, është një xhevahir në kryeqytet.
“Meqenëse është tejet i bukur, diku së paku 4 shekuj e gjysmë i moçëm dhe paraqet një pikë turistike edhe për njerëzit brenda vendit, sidomos për ata që vijnë ta vizitojnë vendin tonë. Është vlerë e lartë historike dhe kulturore meqenëse mësuam se këtu medresenë e ka përfunduar hoxhë Kadri Prishtina”, deklaroi Kurti, sipas të cilit, këtu paraqitet një rrëfim i rëndësishëm për historinë e kryeqytetit dhe të popullit.
Kurti falënderoi Naim Tërnavën për mikpritjen dhe shoqërimin për të parë renovimin dhe punimet që sipas tij janë bërë me një profesionalizëm të jashtëzakonshëm.
Pas xhamisë së Pirinaz, Kurti dhe ministri Çeku vizituan edhe xhaminë Alaudin.
Edhe myftiu Tërnava falënderoi kryeministrin që në natën e madhe e vizitoi xhaminë “Pirinaz” dhe “Alaudin”.
“Në këtë natë të madhe ku të gjithë përgatiten të agjërojnë, ku agjërimi na bën t’i përkushtohemi anës shpirtërore dhe na fisnikëron,” u shpreh Kurti, duke uruar muajin e ramazanit dhe duke iu dëshiruar agjërim sa më të lehtë të gjithë besimtarëve. /Kosovatimes/
