Kryetari i Lidhjes Demokratike të Kosovës, Lumir Abdixhiku ka thënë se mungesa e bashkëpunimit të ngushtë me aleatin kryesor, SHBA-në, sjell pasoja për integrimin euroatlantik të Kosovës dhe sipas tij kjo gjendje është shqetësuese për të gjithë.
Një koment të tillë i pari i LDK-së e bëri sot një deklarim për media në Kuvendin e Kosovës, pas takimit të mbrëmshëm me të dërguarin e posaçëm të SHBA-së për Ballkanin Perëndimor, Gabriel Escobar.
“Ishte një takim informues mbi relacionet bilaterale mes Kosovës dhe SHBA-së. Për ta thënë më thjesht, na u tha qartë dhe zëshëm se ato nuk kanë qenë asnjëherë në nivel më të ulët se sa që janë sot. Kurti përfaqëson Qeverinë e Kosovës dhe këto pasoja patjetër se barten edhe në fatin e Republikës Kosovës. Por, është obligim i gjithë nesh që të ruajmë dhe kultivojmë këto relacione sepse janë të domosdoshme, janë të pa zëvendësueshme dhe në momentet të krizave të tanishme dhe të ardhme janë ekzistenciale për fatin e Republikës së Kosovës dhe vetë sovranitetin tonë”, ka theksuar Abdixhiku.
Ai tutje ka thënë se Kosova nuk ka nevojë për përplasje të tilla me aleatët, derisa tha se nuk duhet që kjo të bëhet pjesë e betejave të përditshme politike në vend.
“Kemi nevojë për maturi, kemi nevojë që orientimin tonë euroatlantik të mos e vëmë në tavolinë të betejave të përditshme politike, për poena momental, por të mendojmë pak më gjatë e më kombëtarisht për Republikën e Kosovës”, ka shtuar Abdixhiku.
Duke komentuar vendimin e Qeverisë për zbatimin e vendimeve të Gjykatës Kushtetuese lidhur me kthimin e pronave për Manastirin e Deçanit, i pari i LDK-së ka thënë se vendimet e Gjykatës Kushtetuese janë të pakontestuara dhe janë të zbatueshme, por ka akuzuar kryeministrin se “ka zgjedhur me vetëdije të plotë që në kauza të tilla të rrejshme të ndërtoj bazën për ardhjen në pushtet”. Por, sipas tij, pas ardhjes në pushtet “Kurti e ka kuptuar se kauzat e rrejshme nuk qëndrojnë”.
