Ndërmarrja Publike “Termokos” ka njoftuar se 1.000 konsumatorëve do t’u shpërndahen faturat me matje sipas konsumit.
“Këta konsumatorë janë përzgjedhur rastësisht, sipas një mostre reprezentative në ato lagje, ku është i shtrirë rrjeti i ngrohjes, përkatësisht tek një pjesë e konsumatorëve, ku tanimë janë instaluar pajisjet matëse. Këta klientë do t’i marrin dy fatura në pliko, një faturë reale të faturimit sipas sipërfaqes ngrohëse dhe një draft faturë krahasuese sipas konsumit”, thuhet në njoftim.
Sipas njoftimit, këta konsumatorë do të mund t’i analizojnë shpenzimet e veta sipas faturës me metra katrorë dhe asaj sipas konsumit.
“Faturat e dizajnuara sipas konsumit, tashmë janë aprovuar nga Zyra e Rregullatorit për Energji. ‘Termokos’ është në proces të vazhdueshëm të testimit të softuerit dhe komponenteve tjera të projektit ‘Prishtina Heatsave’. Deri më tani 17.500 banesa kanë përfituar nga pajisjet falas në banesat e tyre, përfshi termokokat moderne, që kontrollojnë nivelin e ngrohjes”, thuhet në njoftim. /Kosovatimes/
