Llapi ka paralajmëruar ankesë në Shkallën e Dytë pasi paraprakisht Komisioni për Gara në Federatën e Futbollit të Kosovës i ka refuzuar ankesën lidhur me ndeshjen e fundit kundër Malishevës.
Pretendimi i Llapit është pvr aktivizimin e një futbollisti të Malishevës pa të drejtë loje shkaku i kartonëve, ndërsa Komisioni i Garave e ka hudhur poshtë ankesën si të paafatshme.
Por Llapi ka reaguar sërish.
Në një deklaratë të publikuar, Llapi ka theksuar se ata kanë bazuar ankesën e tyre në nenin 62 të Propozicioneve të Garave, që i jep klubeve të drejtën për të ankuar raste të tilla. Ata gjithashtu kanë bërë të qartë se kanë dorëzuar të gjitha arsyetimet dhe pagesën e nevojshme brenda afateve kohore të parapara nga ligji.
“Komisioni për Gara nga ngutia për ta refuzuar ankesën nuk i ka shikuar gjitha nenet të cilat përpilohen nga Komiteti Ekzekutiv i Federatës së Futbollit të Kosovës”, ka shtuar skuadra podujevase.
Në fund, ata kanë shprehur bindjen e tyre se kanë të drejtë plotësisht dhe se do të ndjekin çdo rrugë të mundshme për të dërguar deri në fund këtë çështje, duke u shprehur të gatshëm për të paraqitur ankesën e tyre në Shkallën e Dytë.
