Qytetarët konsumatorë vazhdojnë të përballen me shkelje të të drejtave të garantuara me ligj. Nga 1 janari i këtij viti, në Departamentin për Mbrojtjen e Konsumatorit janë adresuar rreth 750 ankesa, shumica prej të cilave janë të pazgjidhura. Shkeljen e të drejtave të konsumatorëve e pohojnë edhe drejtues të organizatës “Konsumatori” që thonë se konsumatorët sot janë më keq se dikur.
Dita Ndërkombëtare e Konsumatorit, e cila shënohet çdo 15 mars, që nga viti 1962, konsumatorët në Kosovë po i gjen me shkelje të të drejtave të garantuara me ligj. Mashtrimet me çmime apo edhe zbritjet e pavërteta janë mjaft të shpeshta. Por, qytetari Ardian Krasniqi, thotë për Radio Kosovën se shqetësim i madh për të është shitja e produkteve pa afat.
“Personalisht disa herë më ka ndodhur që një produkt të caktuar të paguaj në arkë më shtrenjtë se që ka shkruar çmimi në raft. Për kthimin e centëve as mos të flasim, rrallë ndodh kjo. Por, dukuri shumë më e keqe se kjo është shitja e produkteve pa afat, siç edhe më ka ndodhur të blej. Kjo është shqetësuese, pasi tregon se tregtarët për pak pare, janë në gjendje të rrezikojnë jetën e dikujt”, tha ai.
Ndryshe nga Krasniqi i cili thotë se nuk ka adresuar zyrtarisht ankesë, qytetarë të tjerë nga e gjithë Kosova, nga 1 janari e deri më 14 mars kanë dërguar 749 ankesa në Departamentin për Mbrojtjen e Konsumatorit. Sipas të dhënave publike të këtij institucioni, nga ky numër ankesash me pretendime për shkelje nga më të ndryshmet, janë zgjidhur vetëm 29 përqind e ankesave. Në proces të zgjidhjes janë 530 ankesa.
Selatin Kaçaniku, i cili prej vitesh drejton organizatën “Konsumatori”, po ashtu i tha Radio Kosovës se shkeljet e të drejtave të konsumatorëve janë të mëdha. Sipas tij, numri i ankesave është i vogël, por kjo është pasojë e mosbesimit të qytetarëve në institucionet që duhet t’i mbrojnë.
“Për fat të keq, as kjo qeveri nuk e njeh qytetarin konsumator. Nuk e njeh kauzën e qytetarit konsumator. Kjo situatë është shumë qesharake, në të vërtetë është tragjiko-komike. Ne po paguajmë tatimet e me këtë po financohet qeveria, parlamenti e presidenca, e këta nuk po i njohin konsumatorët. Cka të bëjmë tjetër! Neve po na sabotohen të drejtat juridike e administrative që na takojnë si qytetarë konsumatorë. Do të thotë, ne jemi shumë më keq sot se që kemi qenë dje”, tha Kaçaniku.
Konsumatorët e pa kënaqur me tregtarët apo ofruesit e shërbimeve, ankesat e tyre mund t’i adresojnë në çdo kohë, duke telefonuar pa pagesë në numrin 0800 11000. Ankesat mund të dërgohen edhe online duke klikuar mbi këtë link: https://konsumatori.rks-gov.net/complaintPost.php
