Zyrtarë të Lidhjes Demokratike të Kosovës kanë deklaruar në një konferencë për media se me këtë qeveri janë dëmtuar marrëdhëniet me Shtetet e Bashkuara të Amerikës.
Sipas zëdhënësit të kësaj partie, qeveria ka dëmtuar marrëdhëniet me shtetin amerikan por marrëdhëniet mes popujve mbeten të shkëlqyera.
“Esobar dhe gjithë zyrtarët amerikanë kanë qenë të kujdeshsëm të përçojnë mesazhin që mes dy popujve, popullit amerikan dhe popullit Kosovar marrëdhëniet vazhdojnë të jenë të shkëlqyera. Por kjo qeveri duke vepruar pa u koordinuar me qeverinë e partnerit më të rëndësishëm ndërkombëtar të Kosovës, pra SHBA-në dhe me BE-në atje ku ne synojmë të jemi anëtarë sa më shpejt që të jetë e mundur, janë dëmtuar tej mase marrëdhëniet në mes të dy qeverive por jo në mes të dy popujve” deklaroi zëdhënësi i LDK-së Besian Mustafa.
E i pyetur lidhur me vendimin e pronave të Manastirit të Deçanit Mustafa ka thënë se LDK është gjithmonë pro zbatimit të vendimeve të të gjyqsorit.
“LDK ka zbatuar pa zhurmë, pa presion edhe vendime të Gjykatës Kushtetuese që kanë rrëzuar vetë qeverinë e udhëhequr nga LDK-ja, ky është parim i LDK-së. Vendimi I Gjykatës Kushtetuese është përfundimtar dhe duhet zbatuar. Kauza e Lëvizjes Vetëvendosje kundër këtyre veprimeve që janë vendime të bazuara në vendime të mëparshme të Millosheviqit e që pastaj vet zotri Kurti i zbaton po të njëjtat vendime, e këtë kauzë e ka obligim Kurti të ua shpjegojë qytetarëve të Kosovës se si për 15 vite ka bllokuar çdo proces integrues të Kosovës si drejtë BE-së e gjitha organizatave të tjera ndërkombëtare”, ka deklaruar ai.
Në anën tjetër sa i përket kontratave njëburimore zyrtarët e LDK-së kanë ftuar Prokurorinë e Shtetit që t’i hetojë ato, pasi sipas tyre dikastere të ndryshme kanë dhënë 780 kontrata të tilla në vlerë prej 209 milionë euro.
“Në ministrinë e Ekonomisë kemi 151 kontrata në vlerë prej 124 milionë eurove. Në Ministrinë e Punëve të Jashtme dhe Diasporë, janë 33 kontrata njëburimore me kontraktim të drejtpërdrejtë në vlerë prej 25 milionë euro. Në Ministrinë e Infrastrukturës që përfshijnë edhe Ambientin dhe Planifikimin Hapësinor kemi 69 kontrata njëburimore në vlerë prej 10 milionë e gjysmë euro”, ka deklaruar deputeti Besian Mustafa në konferencën për media.
