Banorët e rajonit të Rekës së Keqe kundërshtojnë pagesën për kanalizim, të cilat u shkojnë bashkë me faturat e ujit, të dërguara nga Kompania e Ujësjellësit “Gjakova”.
Arsyeja pse ata refuzojnë ti kryejnë këto pagesa është e thjeshtë. Ata nuk janë fare të lidhur me rrjetin e kanalizimit.
Madje në mungesë të lidhjes me këtë sistem, shumë nga ta si zgjidhje kanë gropat septike.
“Qe gjashtë muaj na kanë ardhë faturat e ujit me ngritje. Muajin e kaluar edhe këtë muaj ka ndryshim shumë të madh. Në këto fatura të ujit e kanë futë edhe çmimin për kanalizimin. Një sasi e madhe e fshatit nuk kanë kanalizim. Unë kam gropë septike. Si me pagu shtetin për kanalizim kur nuk kam kanalizim?”, deklaroi një banor.
Në kompaninë e ujësjellësit, pavarësisht përpjekjeve të RTK-së, nuk pranuan të deklarohen për këtë çështje.
Ndërkohë, konsumatorët kanë paralajmëruar edhe protesta, nëse kjo tarifë nuk hiqet nga faturat e ujit.
