Ballkani konsideron se një penallti e pa qenë e akorduar në Podujevë në favor të Llapit kundër Gjilanit, sikurse një penallti e pastër në Suharekë e paakorduar për Ballkanin po ashtu ndaj Llapit, kanë bërë që të kenë ndikim direkt në pikët e grumbulluara në tabelë, duke e dëmtuar skuadrën nga Suhareka në të dyja rastet.
Skuadra e drejtuar nga Ilir Daja ka reaguar duke kontestuar drejtësinë në futbollin kosovar.
“A do luajmë të gjithë futboll të drejtë në Superligë ?
Po e bëjmë këtë pyetje sepse veprimet arbitrare pro një skuadre, në dëm të tjerave, tashmë duke se janë kthyer në të zakonshme, e kjo nuk mund të lejohet! Ne nuk jemi ankuar dhe nuk ankohemi asnjëherë kur na dëmton rezultati, pasi kundërshtarët na ndalin me futboll. Por assesi NUK MUND TË HESHTIM kur na dëmtojnë faktorë të tjerë, jo rivalët në fushë. Një penallti e pa qenë e akorduar në Podujevë në favor të Llapit kundër Gjilanit, sikurse një penallti e pastër dje në Suharekë E PA AKORDUAR për ne, po ashtu ndaj Llapit, kanë bërë që këto të kenë ndikim direkt në pikët e grumbulluara në tabelë, duke na dëmtuar ne, në të dyja rastet. Kush jep përgjegjësi për këto gabime të cilat po përcaktojnë ecurinë e kampionatit ?! Na ka mposhtur Fushë Kosova nga fundi i tabelës dhe thjeshtë ia kemi zgjatur dorën kundërshtarëve për angazhim. Por nuk mund të lejojmë dhe s’mund të durojmë që të humbim pikë duke u dëmtuar djersa jonë”, ka shkruar Ballkani. “Sot renditja tabelare në Superligë nuk është nga futbolli i drejtë, këtë po e shikojnë të gjithë, kjo duhet të ndalet, urgjentisht!”.
Ballkani vazhdon ta kryesojë tabelën me pesëdhjetë e dy pikë, një më shumë se sa Llapi që gjendet në vendin e dytë.
