Anëtarët e Komisionit të Pavarur të Mediave, para deputetëve të Komisionit për Media kanë thënë se do të vendosin shpejtë për të drejtat e transmetimit të Premier Ligës.
Kryetari i KPM-së, Jeton Mehmeti, ka thënë se letra e fundit që Premier Liga ka dërguar në Prishtinë javës së kaluar, ka krijuar paqartësi të reja lidhur me të drejtat e transmetimit të Premier Ligës në Kosovë
“Kjo letër na ka shtyrë neve që të kërkojmë prej operatorëve që kanë marrëveshje me Arenën, që t’i ri sjellin edhe njëherë autorizimet që kanë me Arenën sepse duam të jemi të sigurt që operatorët tanë kanë marrëveshje për transmetim të Premier Ligës në Kosovë”, ka thënë Mehmeti, raporton RTKlive.
Anëtari i KPM-së, Besnik Berisha, ka thënë se KPM-ja do të shqyrtojë të drejtat e transmetimit të ndeshjeve të Premier Ligës.
“Shkresa e fundit na i ka heqë dilemat, aty thuhet se Premier Liga nuk e ka autorizuar Arenën që t’ia jap transmetimin Art Motion, kjo shkresë do të merret parasysh dhe do të trajtohet nga KPM”, ka thënë Berisha.
Ndërsa anëtarja tjetër, Luljeta Aliu, ka thënë se dyshimet janë qartësuar tashmë. “Ekziston dyshimi se të paktën nga ana e Arenës kjo ka qenë mashtrim, lajthitje, një çështje që duhet ta marrim shumë seriozisht, besoj qe në këtë moment nëse dëshmohet ky dyshim, atëherë nuk ekziston më ndonjë mirëbesim që Arena t’i ketë të drejtat që të ketë kanal në Kosovë, duhet të marrim hapat ligjor, që kjo të rregullohet”, tha Aliu.
Kurse kryetari i Komisionit për Media, Valon Ramadani, i tha anëtarëve të KPM-së që pret veprim nga ta për këtë situatë.
“Disa çështje që u ngriten janë të qartësuara, sidomos a kanë pas të drejtë ose jo, ose a kanë pas konfirmim për transmetim, letra thotë qartë jo, për neve është shumë me të rëndësi veprimi juaj karshi këtij mashtrimi ndaj shtetit të Kosovës, prej Art Motion dhe Arena-s”, tha Valon Ramadani.
Ndërsa deputeti Agim Veliu, ka thënë se po i bëhet presion pa të drejtë bordit të KPM-së. “Për mua kjo letër nuk sqaron asgjë në favor të argumenteve politike dhe sulmeve, që ky komision po i bënë në drejtim të një organi të pavarur kushtetues, këtu ka vetëm cilësime, pa argumente”, tha ai.
