Presidentja e Kosovës, Vjosa Osmani, pas takimit me Ndihmës Sekretarin për Byronë Ndërkombëtare për Narkotikë dhe Sundim të Ligjit të ShBA-ve, Todd D. Robinson, tha se mbështetja e ShBA-ve për Kosovën ka qenë në çdo hap të shtetndërtimit.
Presidentja Osmani ka deklaruar se Kosova është detyruar të fillonte nga zeroja. “Sukseset tona janë edhe dëshmi e bashkëpunimit me partnerët. Disa nga arritjet më të rëndësishme të institucioneve tona e kanë vulën e byrosë që drejton ndihmëssekretari, përfshirë edhe Policinë e Kosovës. Në takim me ndihmëssekretarin e informova për synimin strategjik të Kosovës për anëtarësim në INTERPOL që do të jetë i pamundur pa mbështetjen e ShBA-së.
Osmani tha se të vetmit që përfitojnë nga mos anëtarësimi i Kosovës në INTERPOL janë kriminelët dhe grupet kriminale.
“Është dëshirë dhe vullnet i përbashkët që ata t’i luftojmë deri në fund dhe pa kompromis”, ka thënë ajo.
Osmani: Mbështetja e ShBA-ve për Kosovën në çdo hap të shtetndërtimit
Ajo ka thënë se është e nderuar që ka pritur në takim Ndihmës Sekretarin Robinson.
“Republika e Kosovës është thellësisht mirënjohëse për ndihmë që ka dhënë Byroja Ndërkombëtare për Narkotikë dhe Sundim të Ligjit të ShBA-ve për institucionet e Kosovës për gjatë viteve. Mbështetja e ShBA-ve për Kosovën ka qenë në çdo hap strategjik dhe në çdo hap të shtetndërtimit”, tha ajo.
Sipas të parës së shtetit, Kosova u detyrua të fillonte nga zero. Duke iu falënderuar ShBA-ve, Osmani tha se në Kosovë janë sjellë disa programe që janë të rëndësishme për vendin.
