Sekretari i përgjithshëm i NATO-s, Jens Stoltenberg, në selinë e NATO-s, është takuar me kryeministrin e Sllovenisë, Robert Golob. Pas takimit ata kanë mbajtur një konferencë për media, ku kanë folur edhe për zhvillimet në Kosovë dhe rajon.
“Sot diskutuam edhe situatën në Ballkanin Perëndimor. Një rajon me rëndësi strategjike në fqinjësinë tonë të përbashkët evropiane dhe me rëndësi strategjike për NATO-n. Shpërthimet e dhunës së vitit të kaluar në Kosovë ishin të papranueshme. NATO u përgjigj me shpejtësi, duke vendosur 1000 trupa shtesë. Ne jemi të përkushtuar të sigurojmë që KFOR-i të vazhdojë të përmbushë mandatin e OKB-së”, tha Stoltenberg.
Stoltenberg ka falënderuar Slloveninë për mbështetjen ndaj Ukrainës dhe kontributet e saj në NATO. Ai ka thënë se në takim diskutuan për situatën në Ballkanin Perëndimor dhe përgatitjet për Samitin NATO-s që mbahet në korrik.
Sekretari i Përgjithshëm i ATO-s, Jens Stoltenberg, theksoi se Sllovenia ka qenë një aleat i NATO-s shumë i vlerësuar dhe i rëndësishëm tani për dy dekada.
“Ne vazhdojmë të vlerësojmë shumë kontributin që Sllovenia po jep për mbrojtjen tonë kolektive, për sigurinë tonë të përbashkët. Fakti që Sllovenia kontribuon në grupet luftarake të NATO-s, si në Sllovaki ashtu edhe në Letoni, tregon se Sllovenia nuk është vetëm një aleat që adreson sfidat në fqinjësinë e afërt, por gjithashtu shikon një pamje më të gjerë. Pastaj, sigurisht që është e rëndësishme për atë që Sllovenia ka bërë dhe vazhdon të bëjë, se si të sigurohet stabiliteti në Ballkanin Perëndimor, si në Bosnje dhe Hercegovinë, por edhe në Kosovë”, tha sekretari i përgjithshëm i NATO-s, Jens Stoltenberg.
Ai bëri tha se Sllovenia për shumë vite ka kontribuar me trupa, forcat e saj në misionin tonë paqeruajtës në Kosovë dhe e ka mirëpritur njoftimin e kryeministrit Golob për të qenë gati për të rritur më tej kontributet sllovene në misionin e KFOR-it.
Kurse kryeministri i Sllovenisë, Robert Golob, ka shprehur gatishmërinë për të kontribuar më shumë, veçanërisht kur bëhet fjalë për stabilitetin e rajonit të Ballkanit Perëndimor.
“KFOR-i është vetëm, do të thosha historia më e rëndësishme dhe më e suksesshme e bashkëpunimit brenda NATO-s, vetë NATO-s, për mënyrën se si të stabilizohet rajoni. Sllovenia në të kaluarën ka një rol shumë të rëndësishëm. Më pas gjatë gjithë vitit, viteve, ne e kemi ulur disi kontributin tonë, por jemi të gatshëm të bëjmë më shumë nëse lind nevoja. Dhe siç duket, po, mund të jetë kështu në muajin e ardhshëm, por është diçka për t’u diskutuar dhe vendosur ende”, tha kryeministri i Sllovenisë, Robert Golob. /Kosovatimes/
