Më 13 mars të vitit 1999, 10 ditë para bombardimeve të NATO-s, në ‘Tregun e Gjelbër’ të Mitrovicës, forcat policore ushtarake serbe kryen një masakër me hedhje granatash në drejtim të civilëve, ku u vranë 7 dhe u plagosën 128 të tjerë.
Një nga të mbijetuarit e kësaj masakre ka rrëfyer për RTK-në se si ka ndodhur ngjarja e tmerrshme, derisa ka folur për plagët që kishte marrë në gjymtyrë, nga të cilat i vuan tash e 25 vjet.
Vetëm 10 ditë para bombardimeve të NATO-s, në mars të 99-s, në ‘Tregun e Gjelbër’, në Mitrovicë, forcat ushtarako-policore serbe, me hedhje granatash masakruan civilë shqiptarë. Në këtë masakër u vranë 7 civilë e u plagosën 128 të tjerë.
Azem Beqiri është një nga të mbijetuarit e masakrës në ‘Tregun e Gjelbër’, në Mitrovicë. Ai thotë se në ditën kur forcat serbe hodhën granata në drejtim të tyre, ishin duke punuar për mbijetesë.
“Më 13 mars të vitit 1999 isha duke punuar në tregun e Mitrovicës, në tezgën time. Afër tezgës, 1.5 metra ka ndodhur eksplozivi. Jo granatë, por eksploziv, ku 7 persona janë të vrarë e mbi 100 persona jemi plagosur”, tha Azem Beqiri, i mbijetuar i masakrës në tregun e gjelbër.
Tash e 25 vjet, Azemi dhe të mbijetuarit e tjerë vuajnë nga plagët e gjymtyrët e dëmtuara.
Personat që humbën në këtë masakër e shumë të tjera të kryera nga forcat policore e ushtarake serbe në Kosovë, ende nuk kanë gjetur drejtësi.
Masakrat e Serbisë në Kosovë nuk u ndalën as para dhe as pas bombardimeve të NATO-s.
