Ministri i Mbrojtjes, Ejup Maqedonci, për Epopenë e Dukagjinit ka vlerësuar se shënon njërën nga ngjarjet më të lavdishme dhe rezistencën ndër më të fuqishmet kundër forcave okupuese gjenocidale serbe.
“Qëndresa heroike e familjes Haradinaj ishte mesazh i qartë për armikun se këtu do ta ketë fundin. Dëshmorët Himë Haradinaj, Gazmend dhe Agron Mehmetaj me sakrificën dhe përjetësimin e tyre treguan që liria dhe atdheu janë më të shtrenjta se jeta”, ka shkruar Maqedonci në rrjetet sociale.
Ai mes tjerash bëri të ditur se në nderim të 24 marsit, sot fillimisht me kryetarin e Kuvendit, Galuk Konjufca, dhe me kolegë ministra, e pastaj me gjeneralë dhe oficerë të ushtrisë sonë, kanë bërë homazhe në Gllogjan.
“Në kullën Haradinaj na priti gjeneral Daut Haradinaj, me të cilin ndamë kujtime nga ditët e lavdishme të rezistencës, qëndresës dhe betejave të Ushtrisë Çlirimtare të Kosovës. Lavdi të rënëve!”, ka shkruar Maqedonci. /Kosovatimes/
