Kryeministri i Kosovës, Albin Kurti, ka shkruar të hënën për sukseset në sundimin e ligjit, në luftën kundër korrupsionit dhe krimit të organizuar. Kurti tha se ka më shumë sundim të ligjit, ndërsa korrupsioni po luftohet në të gjitha pjesët e vendit, përfshirë edhe veriun e Kosovës ku janë mbyllur 27 rrugë ilegale, janë shkatërruar 9 laboratore droge, 6 të kriptovalutave dhe 4 depo të armatimit.
“Në indeksin e Transparency International mbi Perceptimin e Korrupsionit jemi përmirësuar për 21 vende në tri vjet dhe qëndrojmë në renditjen më të lartë ndonjëherë. Eliminimi i tij varet nga prokuroria dhe gjyqësori”, shkruan kryeministri Kurti në Facebook.
Mbi 2.4 ton substanca narkotike janë konfiskuar nga Policia e Kosovës, ndërsa rreth 37 milionë euro, sipas tij, janë mall dhe asete të sekuestruara dhe konfiskuara nga operacionet e Doganës së Kosovës.
“Numri i inspektimeve nga Inspektorati Qendror i Mbikëqyrjes së Tregut është rritur për rreth 63% në krahasim me vitin 2019, shifër kjo rekord e inspektimeve”, thotë më tej kryeministri.
Paraja publike shpenzohet me përgjegjësi dhe ruhet e mbrohet gjithashtu, ndërsa mbi 145 milionë euro, siç deklaron Kurti, i janë kursyer buxhetit të Kosovës nga tri procese të fituara në arbitrazhin ndërkombëtar.
“Në veri të vendit është ulur ilegaliteti, e po shtohet ligjshmëria dhe siguria. Janë mbyllur 27 rrugë ilegale, dhe janë shkatërruar 9 laboratore droge, 6 të kriptovalutave dhe 4 depo të armatimit. Janë sekuestruar alarme e kamera të strukturave ilegale, dhe armatim e asete në vlerë rreth 15 milionë euro nga hetimet mbi sulmin terrorist dhe paramilitar të 24 shtatorit, ku humbëm rreshterin shembullor Afrim Bunjaku, por fituam një Hero të Kosovës dhe dolëm fitues e faqebardhë”, ka shkruar Kurti.
Në veri, sipas Kurtit, janë ngritur 9 stacione policore për mbikëqyrjen dhe kontrollin e kufirit,ndëresa deri në vitin 2021 nuk kishte asnjë.
“Pas 24 vjetëve në komunat veriore janë hapur e funksionalizuar zyrat e Agjencisë së Regjistrimit të Bizneseve të Kosovës dhe të Kadastrave Komunale në shërbim të qytetarëve dhe të bizneseve të ligjshme. Me largimin e targave ilegale, siguria publike është më e mirë. Po shtrohen rrugë që lidhin fshatrat mes vete në veri e me komuna në jug, po ndërtohen e rinovohen shtëpi të banorëve, e po modernizohet infrastruktura e telekomunikimit dhe internetit për shërbimet 4G+ dhe 5G”, shkruan Kurti.
Qeverisje e sundimit të ligjit, e të gjithëve, pa dallim, shkruan në fund ai. /Kosovatimes/
