Presidenti turk Rexhep Tajip Erdogan tha sonte se zgjedhjet lokale në të cilat Partia e tij për Drejtësi dhe Zhvillim humbi, ndër të tjera, në Ankara dhe Stamboll nuk janë fundi, por një “pikë kthese”.
“Zgjedhjet lokale të 31 marsit përfunduan në mënyrë të denjë për demokracinë tonë. Nuk pati incidente që do të hidhnin hije mbi atmosferën zgjedhore . Demokracia turke ka dëshmuar edhe një herë pjekurinë e saj”, u tha Erdogan mbështetësve në Ankara, shkruan gazeta turke “Sabah”.
Ai tha se vullneti i kombit manifestohet në fletëvotim dhe se kombi ua ka përcjellë mesazhin e tij politikanëve.
“Ky 31 mars nuk është fundi, por një pikë kthese. Kombi ynë i ka përcjellë mesazhet e tij politikanëve. Fituesi i këtyre zgjedhjeve është demokracia dhe vullneti ynë kombëtar”, tha Erdogan.
Ai shtoi se shpresonte se rezultatet e zgjedhjeve “do të jenë të dobishme” për Turqinë, popullin e saj dhe qytetet dhe fshatrat e saj.
Më herët, opozita kryesore Partia Popullore Republikane (CHP) shpalli fitoren në zgjedhjet për kryebashkiak në Ankara dhe Stamboll.
Disa raporte tregojnë se CHP kryeson edhe në qytetet e mëdha, si Izmiri, Bursa, Antalia dhe Adana.
Sipas rezultateve paraprake, partia opozitare CHP, për herë të parë në 35 vitet e fundit, kryeson të gjithë vendin me gati 39 për qind të votave të marra.
Qytetarët turq zgjodhën sot kryetarët e bashkive, kryetarët e qarkut dhe zyrtarë të tjerë vendorë që do të mbajnë poste për pesë vitet e ardhshme.
