Ministri i pushtetit lokal Elbert Krasniqi ka marrë vendim për regjistrim falas për komunitetet rom, ashkali dhe egjiptian me qëllim siç theksoi të gjithëpërfshirjes, përfaqësimit dhe qasjes së barabartë në shërbimet dhe burimet komunale.
“Kam kërkuar nga Komunat që të shpallin muajin Prill si muaj falas për regjistrimin e komuniteteve rom, ashkali dhe egjiptian, duke krijuar lehtësira dhe informacione të plota dhe të nevojshme për regjistrim të mëvonshëm të komuniteteve”, tha Krasniqi.
Regjistrimi falas i komuniteteve rom, ashkali dhe egjiptian siç theksoi demonstron përkushtimin tonë ndaj përfshirjes, duke siguruar që të gjithë anëtarët e shoqërisë të njihen dhe të kenë qasje në shërbimet komunale.
“Duke hequr dorë nga tarifat e regjistrimit, komunat eliminojnë barrierat financiare që mund t’i pengojnë komunitetet e margjinalizuara. Kjo qasje jo vetëm që njeh vlerën e tyre të qenësishme, por gjithashtu afirmon të drejtën e tyre për trajtim dhe mundësi të barabartë.
Regjistrimi falas ka për qëllim promovimin e të drejtave themelore të komuniteteve e sidomos të drejtës së regjistrimit si segmenti më i rëndësishëm për gjithë përfshirjen e tyre në shoqërinë kosovare”, tha ministri Krasniqi.
Ai u zotua se do të vazhdojnë të qeverisin me përkushtim drejt ndërtimit të një shoqërie më të drejtë dhe gjithëpërfshirëse, ku çdo individ, pavarësisht nga prejardhja e tij, mund të gëzojë të drejtën e tij për të jetuar me dinjitet dhe për të kontribuuar në shoqëri. /Kosovatimes/
