Komuna e Prishtinës është në proces të hartimit të planit për vlerësimin e rrezikshmërisë, përfshirë rrezikun nga vërshimet, zjarret, rrëshqitja e dheut, tërmetet, erërat e forta apo fatkeqësitë që mund të shkaktohen nga njeriu.
“Këtë vit kryeqytetin e pret një drejtori me një buxhet relativisht të mirë të cilin përkon me nevojat e kërkesat duke filluar nga fatkeqësitë natyrore, sigurinë në shkollë, vendosjen e kamerave të kryeqytetit, rritjen e numrit të zjarrfikësve, pajisja e zjarrfikësve dhe krijimin e shërbimit vullnetar të zjarrfikësve dhe rritjen e bashkëpunimit me qytetarë”, deklaroi Lulzim Fushtica, drejtor për siguri dhe emergjenca në komunën e Prishtinës.
Megjithatë, njohës të çështjeve të sigurisë, deklarojnë se kryeqyteti rrezikohet nga fatkeqësi natyrore, por edhe nga krimi e faktorë të tjerë.
“Përfshirja nga zjarri e ndërtesave, nga njohës të emergjencave, po konsiderohet si dukuri në rritje.
“Në Prishtinë, kryeqytet, kohëve të fundit kemi pasur raste zjarreve nëpër ndërtesa që është një dukuri në rritje, kjo edhe për shkak të mos-njohurisë për rrezikun nga zjarri apo shkaktarët që e shkaktojnë zjarrin në ndërtesa”, deklaroi njohësi i fushës së sigurisë, Fatmir Çollaku.
Ndërsa Tahir Ahmeti, njohës i çështjeve të emergjencave, tha se shkaktarët e zjarreve janë të ndryshëm. “Janë kryesisht nga rryma, nga prizat, kemi pasur rast që kemi pas edhe nga mbushësit e celulareve, etj.” deklaroi Ahmeti.
Ndërkohë, zyrtarë të komunës deklarojnë se plani për vlerësimin e rrezikshmërisë, pritet që brenda muajve në vijim të hartohet dhe të dërgohet për miratim. Ndryshe, nga erërat e forta, muaj më parë, ra kulmi i ndërtesës së re të komunës së Prishtinës, ku për pasojë, një qytetare u lëndua rëndë.
