Pa pjesëmarrjen e deputetëve të opozitës ka filluar shqyrtimi i Projektligjit për tekste shkollore.
Në shqyrtimin e këtij projektligji nga grupi punues po merr pjesë edhe ministrja e Arsimit, Arbërie Nagavci.
Me një pikë të vetme të rendit të ditës, deputetët po diskutojnë mbi amandamentet e projektligjit për të cilin opozita ka ngritur dyshime se projektligji nuk i ka pasur votat e mjaftueshme në Kuvendin e Kosovës në ditën kur është votuar për të.
Sipas tyre, në votim nuk kanë marrë pjesë mbi 60 deputetë, por 60 e që nënkupton se nuk ka pasur kuorum për votimin e projektligjit.
Në mbledhjen e kaluar deputetët e opozitës e kanë lëshuar mbledhjen e komisionit, duke e quajtur projektligjin për tekste shkollore të “kontrabanduar”.
Arjeta Fejza, kryetare e grupit punues, paraqiti para deputetëve amendamentet e propozuara, për të cilat u votua nga 5 deputet të LV-së dhe një nga radhët e komuniteteve.
Pas përfundimit të mbledhjes, kryetari i komisionit për arsim, Ardian Gola, ka thënë se nëse ka diçka për kontestim, i mbetet komisionit për legjislacion dhe mandate për ta interpretuar një rast specifik, nëse është shkelur rregullorja ose jo.
