Policia e Kosovës gjatë 24 orëve të fundit ka intervenuar në tri raste, duke konfiskuar një sasi të konsiderueshme armatimi. E gjithë kjo ka ardhur pasi persona të ndryshëm në rajonin e Prishtinës, Gjilanit e Mitrovicës, kanë shtënë me armë në ajër ose edhe kanë kanosur persona të tjerë.
Sipas policisë, në këto tri raste janë konfiskuar shtatë revole, pushkë të tjera dhe municion.
“Fshati Shkabaj të Prishtinës janë arrestuar dy të dyshuari meshkuj kosovarë, pasi që të njëjtit kishin shtënë disa herë në ajër me armë zjarri. Gjatë kontrollit, te të dyshuarit janë gjetur dhe sekuestruar: dy pistoletë dhe një karikator, ndërsa në vend të ngjarjes janë gjetur tetë gëzhoja. Të dyshuarit, me vendim të prokurorit lirohen, rasti shkon në procedurë të rregullt”, njofton Policia në raportin 24 orësh.
Edhe rasti tjetër ka ndodhur në rrugën “Ernest Koliqi në Gjilan”, ku policia fillimisht kishte intervenuar për një lëndim të lehtë trupor.
“Njësitet policore pas hetimeve të zhvilluara lidhur me rastin e datës 09.04.2024 kanë identifikuar dhe arrestuar 4 persona te dyshuar meshkuj kosovarë dhe gjate bastisjes, të të dyshuarve janë gjetur: tri pistoleta të llojeve te ndryshme; një pushkë e gjatë 10-she si dhe 390 fishekë kalibrash të ndryshëm. Në konsultim me prokurorin, të dyshuari janë dërgua në mbajtje”, njofton policia.
Edhe në fshatin Sllakovc të Vushtrrisë janë arrestuar dy të dyshuar, pasi kishin shtënë disa herë në ajër me armë zjarri.
“Gjatë kontrollit, te të dyshuarit janë gjetur dhe sekuestruar: dy pistoletë dhe 14 fishekë 9 mm me dy karikatorë, ndërsa në vend të ngjarjes janë gjetur disa gëzhoja. Me vendim të prokurorit të dyshuarit lirohen, rasti shkon në procedurë të rregullt”, njofton Policia e Kosovës.
