Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione, është takuar me përfaqësuesit e Komisionit Qeveritar për Persona të Zhdukur si dhe të Këshillit Koordinues të Familjarëve të Personave të Zhdukur.

Kryetari i Komisionit Qeveritar, Andin Hoti, ka thënë se gjatë vitit 2023 kanë realizuar 15 gërmime në Kosovë.

“Në disa prej tyre lokacioneve kemi arritur t’i gjejmë eshtrat e 20 personave të zhdukur, derisa disa prej këtyre rezultateve jemi ende në pritje. Kurse 9 mbetje mortore gjatë këtij procesi u janë dorëzuar familjarëve”.

Hoti ka njoftuar se këtë vit do të punojnë në katër lokacione në Kosovë.

“Sa i përket territorit në Serbi, fatkeqësisht vetëm në një vend në një lokacion ‘Shtaval’ ka pasur gërmime që ka pasur informata dhe dyshime që me autobusë janë bartur personat”, ka thënë ai.

I zhgënjyer për fatin e të pagjeturve është shprehur Ahmet Grajqevci, kryetar i Këshillit të Familjarëve

“Çështja e personave të zhdukur është e mundimshme dhe e dhimbshme, asnjë institucion nuk ka bërë mjaftueshëm. Çështja e dinarit për 24 orë diskutohet por jo edhe e personave të zhdukur që për fatin e tyre e dinë më së miri Serbia”, tha Graicevci