Emisari gjerman për Ballkanin Perëndimor, Manuel Sarrazin, ka thënë se Gjermania do ta mbështesë Kosovën drejt anëtarësimit në Këshillin e Evropës, teksa ka thënë se Serbia nuk po vepron karshi Marrëveshjes së Ohrit.
Njëherësh ai ka vë në pah që edhe Kosova të bëjë gjithçka për t’i bindur shumicën e gjerë të shteteve anëtare për të votuar pro në Këshillin e Ministrave, duke përfshirë edhe të drejtat e pakicave.
“Kemi ndjekur me vëmendje zhvillimet në Asamblenë Parlamentare. Dhe ne, natyrisht, marrim parasysh vendimin e Asamblesë Parlamentare në diskutimet tona. Natyrisht, ne jemi aleatë dhe përkrahës të fortë të Kosovës. Dhe ne qëndrojmë pas idesë për ta afruar Kosovën me Evropën, që nënkupton edhe anëtarësimin në Këshillin e Evropës. Por vendimi në fund do të jetë në Këshillin e Ministrave dhe është thelbësore që Kosova tani të bëjë gjithçka që mund të bëjë për të bindur një shumicë të gjerë të shteteve anëtare. Sidomos të drejtat e pakicave janë një temë kyçe për Këshillin e Evropës”, ka theksuar Sarrazin për në një intervistë për ‘European Western Balkans’.
I pyetur nëse themelimi i Asociacionit të komunave me shumicë serbe do të jetë kusht për anëtarësimin e Kosovës në KiE, Sarrazin ka thënë se për palën gjermane, kriteret e përmendura nga Serbia nuk janë publikuar asnjëherë si kritere të tyre për anëtarësimin e mundshëm të Kosovës në Këshillin e Evropës.
“Në përgjithësi, situata e ballafaqimit me minoritetet në Kosovë është shumë relevante. Por Kosova ka obligim nga marrëveshjet e Brukselit të arritura në vitin 2011 dhe 2013 si dhe nga marrëveshja e Ohrit për të zbatuar Asociacionin. Ajo që është e qartë është se Kosova dhe Serbia duhet të zbatojnë Marrëveshjen e Ohrit, e cila përfshin themelimin e Asociacionit”, ka shtuar Sarrazin.
Ai tutje ka pranuar se veprimet e Serbisë nuk janë në përputhje me Marrëveshjen e Ohrit, sa i përket kundërshtimeve të saj në anëtarësimin e Kosovës në organizatat ndërkombëtare.
“Ka një përkushtim të qartë në marrëveshjen e Ohrit: Serbia nuk duhet ta pengojë Kosovën të hyjë në organizatat ndërkombëtare. Nuk e shoh se si veprimet aktuale të Serbisë janë në përputhje me tekstin apo frymën e marrëveshjes”, ka nënvizuar Sarrazin.
Tutje ai ka folur edhe për rezolutën e OKB-së për Srebrenicën, të cilën Gjermania e bashkë-sponsorizoi.
“Gjermania ka bashkë-sponsorizuar këtë rezolutë së bashku me Ruandën dhe një numër shtetesh të tjera anëtare të OKB-së. Ne jemi globalisht dhe në çdo kohë të përkushtuar për të parandaluar gjenocidin. Është e një rëndësie të madhe për ne që të ruajmë kujtimin e tmerreve të Holokaustit. Kjo është arsyeja pse ne jemi gjithashtu të përkushtuar për të mprehur kujtesën e gjenocideve të tjera të njohura ndërkombëtarisht në historinë e fundit. 11 korriku i ardhshëm shënon vitin e 30-të të gjenocidit ndaj myslimanëve boshnjakë në Srebrenicë në 1995. Gjenocidi është provuar historikisht dhe ligjërisht dhe është klasifikuar si gjenocid nga gjykatat e pavarura ndërkombëtare dhe autorët individualë janë dënuar. Nëpërmjet këtij përkujtimi ne do të nderonim edhe ndjekjen penale të gjenocidit nga juridiksionet ndërkombëtare. Duhet thënë qartë se kjo rezolutë nuk është kundër Serbisë, Republika Srpska apo ndonjë shteti, entiteti apo grupi tjetër. Është e lidhur me krimet që janë kryer dhe gjenocidin që ka ndodhur. Këtë e thonë jo vetëm gjykatat ndërkombëtare, por edhe legjislacioni i Bosnjë-Hercegovinës”, ka theksuar Sarrazin.
