Në Kosovë nesër shënohet 27 Prilli – Dita Kombëtare e Personave të Pagjetur. Kanë kaluar më shumë se 25 vjet nga përfundimi i luftës në Kosovë, ende nuk dihet fati i më shumë se 1.600 të pagjeturve.
Pritje, dhimbje e vetmi plot 25 vjet janë edhe për Ferdonije Qerkezin, nga Gjakova, e cila në luftë humbi bashkëshortin dhe 4 djemtë e saj, dy prej të cilëve janë gjetur, derisa bashkëshorti dhe dy djem të tjerë ende figurojnë të zhdukur.
“27 Prillin e pres me dhimbje të madhe. Kam të zhdukur burrin dhe dy djemtë, derisa dy të tjerë janë gjetur. Pra Dita e 27 Prillit është dita më e ngarkuar, më e mërzitshme, jo vetëm për mua por edhe për të gjithë të tjerët”, deklaroi Nënë Ferdonije për “Lajmet e fundit” në RTK.
Ajo më tej tha se për zbardhjen e fatit të të pagjeturve po punohet, por që është vështirë të gjendet zgjidhja me shtetin e Serbisë.
“Për fatin e burrit dhe dy djemve të mi, që ende nuk janë gjetur, ditët po kalojnë e dhimbja sa vjen e shtohet, porse shpresa nuk na zhduket se një ditë fati i tyre do të zbardhet. Se një ditë do të çelen arkivat”, deklaroi Nënë Ferdonije.
Nënë Ferdonije pati kritika ndaj institucioneve shtetërore në përkujdesjen e tyre ndaj saj dhe familjarëve të të pagjeturve në përgjithësi. Ajo vizitohet vetëm në shënimin e përvjetorëve të ngjarjeve.
Ndryshe, shtëpia e Nënë Ferdonijes është shndërruar në shtëpi Muze ku ruhen të gjitha reliktet e anëtarëve të familjes Qerkezi, që nga koha e luftës.
Kjo shtëpi muze nesër pritet të vendoset pllaka, ku do të pagëzohet ‘Shtëpia e Durimit’, nga Kuvendi Komunal i Gjakovës.
