Në ditën kombëtare të të zhdukurve, kryetari i Partisë Demokratike të Kosovës, Memli Krasniqi, ka thënë se Meja është e vërteta e Serbisë, Meja flet për viktimën dhe agresorin, më fuqishëm dhe më drejtë se cilado gjykatë.
Ai në një postim në Facebook ka theksuar se gjenocidi i orkestruar i shtetit serb në Kosovë, vjen e shfaqet në mënyrën e tij më barbare në Mejë të Gjakovës, me 27 prill të vitit 1999, duke lënë pas vetes 376 persona të masakruar.
“Pleq, burra e fëmijë – të vrarë në gjakftohtësi dhe me paramendim. Të gjithë civilë e të pafajshëm. 36 djem ishin nën moshën 18 vjeç. Trupat e 13 viktimave ende nuk janë gjetur.
Dhjetëra oficerë të lartë serbë ishin të përfshirë, direkt ose indirekt, apo ishin në dijeni për këtë masakër. Të gjithë ata janë të lirë dhe nuk kanë dhënë asnjëherë llogari për krimet e kryera në Mejë dhe vende tjera të Kosovës”, ka shkruar Memli Krasniqi.
Më herët duke folur për Ditën Kombëtare të Personave të Zhdukur, Krasnuiqu ka rikujtuar 1617 qytetarët e Kosovës, fati i të cilëve mbetet ende i panjohur, historitë e tyre të papërfunduara dhe familjet e të cilëve vazhdojnë të presin në dhembje.
“Sot, ne qëndrojmë të bashkuar në kërkesën tonë për drejtësi dhe qartësi. Është përgjegjësia jonë kolektive të mos ndalemi. Të mos i harrojmë.
Të sigurohemi që po bëhet çdo përpjekje e mundshme për t’u sjellë ngushëllim familjeve që kanë kaluar vite duke pritur për një shenjë, një fjalë ose një vend për të vendosur më në fund lulet e tyre”, ka shkruar Kranqi.
“Nuk ka prehje e shërim pa zbulimin e së vërtetës. Asnjëherë nuk do të harrojmë!”, ka përfunduar postimin e tij kreu i PDK-së. /Kosovatimes/
