Bashkimi Evropian mbështet një strukturë të vetme institucionale dhe administrative brenda Kosovës. Kështu është shprehur zëdhënësi i BE-së, Peter Stano duke u përgjigjur në pyetjen se cili është qëndrimi i Brukselit në lidhje me strukturat paralele të Serbisë që veprojnë në Kosovë.
“Të gjitha marrëveshjet e kaluara të dialogut janë plotësisht të harmonizuara me parimin e strukturës së vetme institucionale dhe administrative, dhe ato ndjekin kornizën ligjore dhe institucionale të Kosovës, siç konfirmohet nga Konkluzionet e Këshillit Evropian”, ka nënvizuar Stano në një përgjigje me shkrim.
Kjo çështje u ngrit me rastin e takimit të fundit në kuadër të dialogut ku u diskutua për çështjen e dinarit e me ç’rast pala serbe ka kërkuar që të gjitha strukturat e Serbisë të vazhdojnë të financohen deri në kohën kur të krijohet Asociacioni.
Sipas shpjegimit të Stanos, statusi i strukturave të mbështetura nga Serbia është paraparë të zgjidhet në kuadër të dialogut e në lidhje me themelimin e Asociacionit të komunave me shumicë serbe në Kosovë.
Nga Brukseli sërish iu bë thirrje Kosovës që të ecë përpara dhe pa vonesa të mëtejshme, me themelimin e Asociacionit e në përputhje me Draft Statutin e Bashkimit Evropian.
