Arben Fetoshi, njohës i çështjeve politike, ka folur për aktualitetin politik në vend, për anëtarësimin e Kosovës në Këshillin e Evropës si dhe për çështje të tjera politike.
Në fillim, Fetoshi foli për formimin e qeverisë në Serbi, në përbërjen e të cilës janë dy zyrtarë që janë në listën e zezë të ShBA-së e që, sipas tij, ky veprim nuk zgjoi ndonjë befasi, e gjitha ishte e pritshme.
“Serbia vazhdon të luajë politikën e dy karrigeve, për të ruajtur raport e mirë me Rusinë dhe në raport me Perëndimin”, deklaroi Fetoshi, në “InfoPlus”, në RTK.
Ndërkaq lidhur me presionet nga ana e Perëndimit kundrejt Serbisë që të ndërrojë kurs në politikën e saj të jashtme, Fetoshi e vlerësoi si të pamjaftueshme, por që, shtoi ai, Perëndimi e ka kuptuar se politika ledhatuese ndaj Serbisë ishte një qasje e gabueshme.
“Perëndimi do të duhej ta shikonte Serbinë si lojtar problematik për sigurinë në rajon”, deklaroi Fetoshi.
Ai tutje shpjegoi strategjinë e politikës serbe, statusquonë, sidomos në raport me Kosovën e që është e interesuar të shikojë epilogun e luftës në Ukrainë për të vepruar tutje si zgjidhje simetrike edhe me Kosovën.
E qasja e BE-së kundrejt Kosovës, Fetoshi konsideron se nuk ka qenë simetrike, teksa shtoi se edhe institucionet tona duhet parë se si kanë vepruar sa i përket detyrave, përgjegjësive të saja, të shfrytëzimit të situatës me qëllim që të imponohej një dinamikë e shtuar në raport me Serbinë që ta pranonte realitetin në Kosovë.
Në këtë prizmë, Fetoshi u shpreh kritik ndaj qeverisë, sidomos në raport me partnerët tanë strategjikë, veçmas me ShBA-në.
“Tërë procesi i dialogut është dashur të fokusohet në menaxhimin e krizave e jo në krijimin e premisave që Beogradi zyrtar të vihej me shpatulla për muri, sa i përket përmbushjeve të detyrimeve të dala nga marrëveshja e darkorduar në Ohër”, deklaroi Fetoshi.
Ndërsa sa i përket Asociacionit, Fetoshi tha se qeveria në këtë çështje më shumë ka kalkuluar në interesa elektorale të partisë në pushtet, sesa te një qasje pragmatike në përputhej me interesin e vendit.
E për anëtarësimin e Kosovës në KiE, Fetoshi tha se jemi në një situatë tejet kritike që rrezikon të dështojë nëse, sikundër tha ai, nuk lëvizim në përputhje me kërkesat e ndërkombëtarëve që të bëjmë hapa konkretë.
“E pyetja themelore në krejt këtë është: Në qoftë se nesër bën të fillohet me themelimin e Asociacionit e Komunave me Shumicë Serbe, atëherë pse jo sot?”, shtroi pyetjen në procedimin e çështjes, njohësi i çështjeve politike, Arben Fetoshi.
Në rast të shtyrjes së anëtarësimit të Kosovës në KiE, Fetoshi tha se vendin tonë e presin ditë të vështira në të ardhmen, duke mos anashkaluar edhe zgjedhjet e parakohshme.
