Janjeva e Lipjanit tash e një kohë po përballet me mungesën e transportit publik. Banorëve të këtij fshati një situatë e tillë po u krijon vështirësi në udhëtim.
Komuna e Lipjanit pret që në marrëveshje me Prishtinën të krijoj linjë të veçantë për këtë lokalitet.
Derisa po merrte rrugën për në kryeqytet, Fehmi Gajtani nga Janjeva duhet t’i ndërrojë disa autobusë. Kjo i ndodh shpesh, sepse nuk ka zgjidhje tjetër. Problemin kryesor e ka lidhjen me Prishtinën.
“Banoret hypin deri ne kryq shkojnë me këtë autobusin, e ndërrojnë tjetrin autobus te Ferizajt, apo te Gjilanit kur vine, është kriju vështirësi, është mirë sa më shpejt marrëveshja te realizohet, dhe te vjen transporti urban i Prishtinës edhe ne Janjevë”, ka thënë Gajtani.
Brengën e njëjtë e ndajnë edhe vendësit e tij.
Nënkryetari i Lipjanit, Diaman Bytyqi, e pranon që Janjeva ka mbetur pa lidhje transporti.
“Kemi pasur disa herë kërkesa prej banorëve të riaktivizohet linja për Prishtinë, por për shkak edhe të numrit të vogël të udhëtarëve , kompanitë nuk kanë qenë të interesuara të aktivizojnë këtë linjë prej Janjevës në Prishtinë”, ka thënë Bytyqi.
Bytyqi thotë se në marrëveshje me Komunën e Prishtinës kanë kërkuar që një linjë e Trafikut Urban të ndahet për relacionin Janjevë-Prishtinë.
