Asociacioni i Gazetarëve të Kosovës me Këshillin e Mediave të Shkruara të Kosovës dhe Komisionin e Pavarur për Medie po shënojnë Ditën Botërore të Lirisë së Shtypit, me një diskutim për sfidat e ruajtjes së standardeve profesionale dhe kodit të etikës gjatë raportimit.
Kryetari i Asociacionit të Gazetarëve të Kosovës, Xhemajl Rexha, tha se ka pasur sulme ndaj gazetarëve dhe ato kanë cenuar rënd sigurinë e integritetit të gazetarëve.
Ai ka deklaruar se nuk është koha e duhur që mediat online të kontrollohen, në formën e propozuar.
Kurse shefi i misionit të OSBE-së në Kosovë, Michael Davenport, theksoi se gazetarët duhet të jenë të lirë, të sigurt dhe të mos kenë frikë nga shantazhet.
Ai tha se në Kosovë ka pasur rritje të dhunës ndaj gazetarëve.
Mehmeti: Në Kosovë ka ligje që garantojnë lirinë e shprehjes
Jeton Mehmeti, kryetar për Këshillin e Mediave të Shkruara të Kosovës, lidhur me raportin për renditjen e Kosovës 19 vende më poshtë në Indeksin e Reporterëve pa Kufij, theksoi se kjo rënie nuk na gëzon asnjërin në Kosovë. sipas tij, dëshira është që të jemi sa më afër vendit të parë që është Norvegjia dhe sa më larg vendit të fundit 180, ku është Koreja e Veriut.
“KPM-ja ka qenë inefektive, siç thuhet në raport, në kuptimin që gjysmën e vitit të kaluar nuk kemi pasur kuorum për vendimmarrje dhe kësisoj nuk kemi mundur as të marrim ndonjë vendim sa iu përket obligimeve tona ligjore. Tek në qershor të vitit të kaluar jemi konstituar si komision i ri dhe pastaj kemi vendosur të mbajmë mbledhje dhe t’i trajtojmë të gjitha rastet në mënyrë të përshpejtuar”, tha ai
I pari i KPM-së theksoi se kemi mbi 250 medie të licencuara.
“Në Kosovë ka ligje që garantojnë lirinë e shprehjes, ka ligje që garantojnë mbrojtjen – burimin e informacion, ka ligje që garantojnë sinjalizuesit të cilët shpeshherë janë iniciatorë të reformave të shumta të cilat pastaj mediat i elaborojnë e mund të çojnë në ndryshime të mëdha në aspektin politik e të qeverisjes”, theksoi Mehmeti.
“Po ashtu, raporti përmend pluralizmin medial në vendin tonë. Ne si KPM kemi mbi 250 medie të licencuara që u shërbejnë komuniteteve të ndryshme në Kosovë, përfshirë ato në gjuhën serbe, boshnjake, gorane në gjuhën rome, gjuhën turke dhe natyrisht në gjuhën shqipe si shumicë e komunitetit”, shtoi ai.