Bashkëkryetarja e Partisë Socialiste në Greqi Arminda Plangarica ka deklaruar për RTSH24 se takimi i nesërm i kryeministrit Edi Rama me Diasporën shqiptare në Greqi synon që të sjellë një platformë reale për Diasporën.
Sipas Plangaricës, ky takim është mjaft pozitiv pasi do t’u drejtohet të gjithë shqiptarëve përtej dallimeve politike.
“Ky takim nuk i drejtohet vetëm instancave të Partisë Socialiste por të gjithë shqiptarëve që ndodhen në Athinë pa dallime ngjyre politike. Kryeministri ka ardhur edhe herë të tjera në Athinë por nuk ka qenë në një aktivitet kaq të hapur dhe me një platformë reale. Sepse pritet që nesër të dëgjojmë një platformë reale që i takon Diasporës, nuk i takon anëtarëve të Partisë Socialiste apo Partisë Socialiste ku Edi Rama përveçse kryeministër është edhe kryetar partie. I takon të gjithë shqiptarëve. Është pozitiv fakti që kryeministri po vjen me një platformë reale”, u shpreh Plangarica.
E pyetur se si janë pritur nga shqiptarët deklaratat e kryeministrit grek Mitsotakis se vizita e kreut të qeverisë shqiptare është e parakohshme, Plangarica tha se ishte krejt e panevojshme për të pasur deklarata të tilla me konotacion nacionalist.
“Na u krijua çudi dhe pikëpyetje, por nuk ndaluam. Nuk kishim kohë të mendonim se përse në këtë moment u hapën të tilla zjarre nacionalizmi. Ne kishim prioritet të organizonim takimin. Kemi të drejtë që pas 30 e ca vjetëve kemi krijuar atë pjesë jo me të emigrantëve por të Diasporës shqiptare në Greqi të presim një njeri tonin. E dimë që janë deklarata sipërfaqësore. Deklaratat nuk na prekën! E quajmë një incident të vogël diplomatik që nuk u thellua edhe falë kryeministrit Rama”, theksoi Plangarica për RTSH24.
