RTK ka vazhduar debatin për raportin e punës në Mitrovicën e jugut dhe atë të veriut.
Në takim me minatorët e Trepçës dhe drejtuesit e kësaj ndërmarrje në Stantërg, drejtori i përgjithshëm Shkumbin Ahmetxhekaj prezantoi punën e vitit 2023, duke e theksuar si hap të rëndësishëm hapjen e zyrës rajonale në Mitrovicë. Ai kërkoi nga pjesëmarrësit në këtë takim që të jenë proaktiv në kërkesa programore për transmetuesin publik, në mënyrë që RTK-ja të jetë sa më afër tyre. Bashkëbiseduesit kërkuan që në skemën programore të ketë më shumë emisione edukative dhe mirëpritën rikthimin e ligave evropiane të futbollit. Ata po ashtu kërkuan që të ketë më shumë reportazhe nga jeta dhe puna e përditshme e qytetarëve. Më pas, ekipi i RTK-së u takua me gazetarë dhe përfaqësues të shoqërisë civile në Mitrovicën e Veriut. Në këtë takim u diskutua veçmas për punën e RTK2, sfidat dhe angazhimin e stafit që në mënyrë profesionale po përmbush misionin si pjesë e mediumit publik. Në këtë kontekst u përmenden investimet në RTK, me theks të veçantë tek planet për studion e re televizive të RTK2. Po ashtu drejtori Ahmetxhekaj kërkoi nga pjesëmarrësit në takim që të inkurajojnë profesionistët serb të Kosovës që të bëhen pjesë e RTK-së. Debati me publikun do të vazhdojë nesër në Universitetin “Kadri Zeka” në Gjilan.
