Ballkani ka arritur të shënojë fitore si mysafir në derbin e sezonit ndaj Llapit në “Zahir Pajaziti” me rezultat 1-0,që ia siguron titullin e kampionit një xhiro para fundit.
Llapin vetëm fitorja e mbante në luftë për titull kampioni, ndërsa Ballkani edhe me barazim shpallej kampion.
Pas një pjesë të parë me raste, asnjëra skuadër nuk arriti të shënonte.
Në pjesën e dytë, Llapi u lëshua i tëri në sulm për të gjetur golin e epërsisë, por duke lënë hapësira të mëdha prapa.
Ballkani arriti të shënojë një gol të bukur nga një kundër zbrijte, ku Bernard Karrica u fut bukur mes mbrojtësve të Llapit dhe i vetëm me Ilir Avdylin shënoi për 1-0.
Pas pesë minutash, Meriton Korenica ka mundur ta mbyll ndeshjen, por që goditja e tij shkoi mbi portë.
Llapi kishte mundësi të barazonte me Ahmed Januzin, por gjuajtja e tij shkoi jashtë.
Deri në fund nuk kishte më gola të tjerë dhe Ballkani duke e mposhtur rivalin direkt shpallet kampion i Kosovës për herë të tretë me radhë.
Në anën tjetër, Gjilani e ka fituar derbin e Anamoravës me fitore 2:0 ndaj rivalit lokal, Drita.
“Skifterat” ishin më të mirë shumicën e kohës duke marrë parasysh edhe që kanë nevojë vetëm për fitore që t’iu ikë zonës së barazhit.
Edison Kqiku (12’) dhe Kushtrim Shabani (48’) shënuan nga një gol që për Gjilanin ka vlerën e tre pikëve.
Fitore të madhe ka shënuar edhe Prishtina, që e demoloi Fushë Kosovën me rezultat të thellë 5:0.
Bardhëkaltërit ishin mahnitës, duke kaluar fillimisht në epërsi me anë të kapitenit Mërgim Pefqeli (38’), ndërsa Ardian Limani dyfishoi epërsinë (45’).
Për golin e tretë dhe të katërt u përkujdes Hasan Hyseni, që realizoi dy herë brenda gjashtë minutave (61’, 67’). Ndërsa, fitoren e vulosi Igball Jashari (65’).
Malisheva gjithashtu regjistroi fitore të thellë me rezultat 7:4 si nikoqir i Lirisë së Prizrenit.
Më i miri ishte talenti Drilon Hazrollaj që kompletoi ‘pokerin’ (45+3’, 49’, 51’, 82’), ndihmuar nga Etnik Bruti me dygolësh (66’, 67’), si dhe një gol i Altin Aliut (42’).
Sa i përket Lirisë, shënuan Valmir Berisha (32’), Ubong Ekpai (55’) si dhe Aldi Gjumsi (75’, 90’).
Përballje tjetër interesante ishte ndërmjet Feronikelit ’74 dhe Dukagjinit, ku klubi nga Drenasi fitoi me rezultat të ngushtë 3:2.
Agron Bruqi i dha epërsinë Niklit (29’), por që Dukagjini u barazoi shpejtë me anë të Redon Sylës (31’).
Sidoqoftë, vendasit e kthyen epërsinë përmes Ibrahim Cërvadikut (38’), rezultat me të cilën përfundoi kjo pjesë.
Dukagjini arriti prapë ta barazonte, këtë herë me Amsal Krasniqin (51’), mirëpo Robert Rrahmani gëzoi vendasit me një gol të bukur për t’ua fituar pikët e plota (69’).
