Policia e Kosovës ka arrestuar të dyshuarit e përfshirë në rastin e koduar “Rrethi”, të cilëve u janë konfiskuar narkotikë në vlerë monetare rreth 6000 euro.
Në komunikatën e dërguar për media bëhet e ditur se fillimisht janë ndaluar dy të dyshuarit e rastit rreth orës 14:30 në rrugën e “Pejës’’ në Fushë Kosovë.
“Personat e dyshuar E.XH., (viti i lindjes 1982) dheA.I., (viti i lindjes 1979) janë ndaluar, por gjatë ndalimit është vërejtur se i dyshuari i dytë me qëllim të fshehjes së dëshmive ka gëlltitur një qese të vogël me lëndë narkotike të llojit kokainë, të cilën paraprakisht e kishte blerë nga i dyshuari i parë”, bëhet me dije në komunikatë.
Tutje thuhet se gjatë kontrollit të apartamentit të të dyshuarit me iniciale E.XH., policia ka gjetur substancë të dyshuar narkotike kokainë e ndarë në 17 qese, përzierës prej 63 gramësh për shtimin e kokainës, para të gatshme në vlerë 1750 Euro, tre armë automatike AK-47 dhe disa mjete tjera.
“Të dyshuarit janë shoqëruar për intervistim dhe në konsultim me prokurorin kujdestar i dyshuari E.XH. dërgohet në mbajtje për rastet nga neni 267 dhe 366 i KPRK-së , kurse i dyshuari A.I dërgohet në mbajtje për disa urdhër arreste të mëhershme të cilat i kishte aktive”, vazhdon komunikata. /Kosovatimes/
