Presidentja e vendit, Vjosa Osmani, ka kujtuar masakrën në burgun e Dubravës, të 22 majit të vitit 1999, ku pushteti gjenocidal i Serbisë i vrau në këtë burg 120 të burgosur shqiptarë të luftës dhe të burgosur politikë.
Osmani, në një postim në Facebook, tha se kjo masakër shpërfaqi, sikur edhe në shumë herë të tjera gjithandej Kosovës, egërsinë e pushtetit kriminal kundrejt të burgosurve shqiptarë të luftës.
“25-vjet më parë, prej 19-24 maj 1999, pushteti gjenocidal i Serbisë i vrau brenda burgut të Dubravës 120 të burgosur shqiptarë të luftës dhe të burgosur politikë dhe i plagosi 300 të tjerë. Kjo masakër shpërfaqi sikur edhe në shumë masakra të tjera gjithandej Kosovës, egërsinë e pushtetit kriminal kundrejt të burgosurve shqiptarë të luftës dhe të burgosurve politik, të cilët padrejtësisht mbaheshin në burg. Sot, bashkëndjejmë me të gjitha familjet që humbën anëtarët e tyre në këtë masakër, ndërkaq të mbijetuarit i inkurajojmë të vazhdojnë ta mbrojnë të vërtetën dhe të luftojnë për drejtësi. Drejtësi për viktimat dhe kujtim i përhershëm për to!”, ka shkruar Osmani në Facebook. /Kosovatimes/
