Barcelona ka shkarkuar trajnerin Xavi Hernandez të premten, pas dështimit të skuadrës për të fituar një trofe gjatë këtij sezoni.
Në janar, Xavi kishte deklaruar se do të largohej në fund të sezonit, por forma e mirë e skuadrës në prill bëri që ai dhe presidenti Joan Laporta të bien dakord për vazhdimin e qëndrimit të tij për sezonin e ardhshëm, me kontratën që do të përfundonte në qershor 2025. Megjithatë, situata ka ndryshuar shpejt. Sipas mediave spanjolle, presidenti Laporta është zemëruar nga komentet e Xavit, i cili tha se ishte e vështirë për klubin të konkurronte me Real Madridin dhe skuadrat e tjera elitare evropiane për shkak të kufizimeve financiare.
“Presidenti i Barcelonës, Joan Laporta i ka thënë Xavi Hernandez se nuk do të vazhdojë si trajner për sezonin 2024/25,” thuhet në një deklaratë zyrtare të klubit.
Sezoni aktual ka qenë i vështirë për Barcelonën. Pavarësisht triumfit në La Ligë sezonin e kaluar, klubi nuk arriti të mbrojë titullin këtë vit. Ata u eliminuan nga Champions League në çerekfinale nga Paris Saint-Germain, humbën në finalen e Superkupës së Spanjës ndaj Real Madridit, dhe pësuan një disfatë nga Athletic Bilbao në Copa del Rey.
Xavi do ta drejtojë ndeshjen e fundit të skuadrës në La Liga të dielën në Sevilla, përpara se të largohet nga posti i tij. Ndërkohë, ish-trajneri i Bayern Munichut dhe Gjermanisë, Hansi Flick, pritet të marrë drejtimin e Barcelonës pas largimit të Xavit.
