Nga muaji shtator i këtij viti disa shkolla në kryeqytet pritet të fillojnë me mësim tërë ditor. Kështu kanë bërë të ditur drejtues të komunës së Prishtinës. Ndërkaq, njohës të arsimit po vlerësojnë së në këtë proces është i rëndësishëm përfshirja e përfaqësuesve të shkollave dhe prindërve.
Tetë shkolla në komunën e Prishtinës janë përzgjedhur për realizimin e mësimit tërë ditor, por vetëm në pesë prej tyre që nga muaji shtator pritet të filloj ky proces. Drejtoresha e Arsimit në Komunën e Prishtinës, Jehona Lushaku-Sadriu, në një përgjigje më shkrim i tha Radio Kosovës së janë në fazën e analizimit për të filluar me këtë dhe se në muajin shtator planifikohet të bëhet riorganizimi i disa shkollave.
“Ka disa muaj që po analizojmë të dhënat e shkollave me qëllim që të realizojmë mësimin tërë ditor për klasat 1-5. Këtë lëvizje po e bëjmë me qëllim të përmirësimit të cilësisë së mësim nxënies për nxënësit e shkollave të Kryeqytetit dhe lehtësimin e jetës së prindërve të cilët është dashur t’i mësojnë fëmijët e tyre si pasojë e orarit të shkurtër dhe pamundësisë që fëmijët të kuptojnë mësimet për shkak të presionit të kohës. Në këtë fazë, në muajin shtator planifikohet të bëhet riorganizimi i disa shkollave. Ndërsa, planifikimi për të gjitha shkollat synojmë ta realizojmë në 4 vitet e ardhshme”, tha Lushaku.
Këtë vendim të duhur dhe në interes të nxënësve po e shohin njohës të arsimit. Rinor Qehaja nga instituti “ Edguard” tha për Radio Kosovën së para së të këtë një vendim përfundimtar nga ana e komunës është e rëndësishme përfshirja e të gjithë komunitetit në këtë proces.
“Derisa të kemi një vendim të prerë nga ana e komunës për mësimin tërë ditor është shumë e rëndësishme që komuna të përfshijë të gjithë hisedarët në këtë vendimmarrje. Pra, duhet një komunikim dhe koordinim i vazhdueshëm më shkollat dhe komunitetin e prindërve. Kjo besoj që është më e arsyeshmja dhe jam i bindur që çfarë do vendimi që merret është në interes të fëmijëve dhe komunitetit”, tha Qehaja
Në fund të muajit maj komuna e Prishtinës pritet të shpalosë detajet në lidhje më fillimin e mësimit tërë ditor që do të praktikohet vetëm për nxënësit nga klasa e parë deri në të pestën.
Në vitin 2015 në komunën e Prishtinës shkolla, “Faik Konica”, “Afrim Gashi” dhe shkolla “Model” kanë filluar më një pilot-projekt më mësim tërë ditor, por se pa kaluar ende testi, është vlerësuar se nuk ka kushte teknike për të aplikuar këtë nivel mësimi.
